சோர்வின்றி வலம் வரும் களைப்பறியா கருணாநிதி.. உற்சாகத்தில் தொண்டர்கள்!

Updated: Monday, April 21, 2014, 14:46 [IST]

Subscribe to Oneindia Tamil

சென்னை: மாவட்டக் கழகத்தின் செயலாளர்களே, முன்னாள் அமைச்சர்களே, தோழமைக் கட்சிகளைச் சேர்ந்த நண்பர்களே, கழகத்தினுடைய செயல் வீரர்களே, பெரியோர்களே, தாய்மார்களே... இந்த வார்த்தைகளை அந்த 90 வயது வாய்... உதிர்க்கும் வரை அமைதி காக்கும் அந்த பெரும் கூட்டம்...என் உயிரினும் மேலான அன்பு உடன்பிறப்புகளே.. என்று சொல்லி நிறுத்தும்போது அப்படி ஒரு 'அப்ளாஸ்'... ஒரு மாபெரும் இயக்கத்தை காலாகாலமாக கட்டிப் போட்டு வைத்திருக்கும் அந்த ஒற்றை வார்த்தைக்காகத்தான் அத்தனை கூட்டம் காத்திருந்தது.

களைப்பறியா அந்த உதயசூரியன் அடுத்தடுத்து அடுக்கடுக்காக அருவியாக கொட்டி முழங்கிய ஒவ்வொரு பேச்சையும் கண் கொத்திப் பாம்பாக உன்னித்துக் கவனித்து ஆர்ப்பரிக்கிறது கூட்டம்..

இந்த வயதிலும் சோர்வறியாமல், தடுமாறாமல், வார்த்தைகளைத் தேடாமல், நீர்வீழ்ச்சி போல பாய்ந்து வரும் வார்த்தைகளையும், டைமிங் வசனங்களையும் .. நாசூக்கான நக்கல் நையாண்டிகளையும் இத்தனை காலமாக கேட்டும், சற்றும் அலுத்துப் போகாமல் தலைவா என்று முழக்கத்துடன் ஆர்ப்பரித்து சந்தோஷித்துக் களைகிறது திமுகவின் தொண்டர் படை.

எல்லாத் தேர்தல்களிலும் பட்டி தொட்டியெங்கும் முழக்கமிடத் தவறாத திமுக தலைவர் கருணாநிதி, இந்த முறை சூறாவளி சுற்றுப்பயணம் போகாவிட்டாலும் கூட அவரது வருகை திமுகவினருக்கு நிம்மதிப் பெருமூச்சு அளிக்கும் தென்றலாக தவழ்ந்து கொண்டுதான் உள்ளது.

வாருங்கள் கருணாநிதியின் சுற்றுப் பயணத்தை ஒரு ரவுண்டு பார்த்து விட்டு வரலாம்..