கடும் தோல்வியின் பின்னணியில் 91வது பிறந்த நாள் காணும் கருணாநிதி

சென்னை: லோக்சபா தேர்தலில் மிகப் பெரிய தோல்வியைச் சந்தித்துள்ள பின்னணியில் திமுக தலைவர் கருணாநிதியின் 91வது பிறந்த நாள் ஜூன் 3ம் தேதி கொண்டாடப்படவுள்ளது.

இதையொட்டி அன்று மாலை சென்னை ராயப்பேட்டையில் பிறந்த நாள் விழா பொதுக்கூட்டம் நடைபெறவுள்ளது.

இதற்கு முன்பாக ஜூன் 2ம் தேதி திமுகவின் உயர் நிலை செயல் திட்டக் குழுக் கூட்டம் கூடுகிறது. அக்கூட்டத்தில் எடுக்கப்படும் முடிவுகளை தனது பிறந்த நாள் விழா பொதுக் கூட்டத்தில் கருணாநிதி விளக்கிப் பேசுவார் என்று தெரிகிறது.

நடந்து முடிந்த லோக்சபா தேர்தலில் திமுக கூட்டணி பெரும் தோல்வியைச் சந்தித்தது. திமுக தான் போட்டியிட்ட 35 தொகுதிகளிலும் தோல்வியைத் தழுவியது. இதனால் கட்சியினர் சோர்ந்து போயுள்ளனர்.

இந்த நிலையில் ஜூன் 2ம் தேதி உயர் நிலை செயல்திட்டக் குழு கூடி விவாதிக்கிறது. அடுத்த நாள் கருணாநிதியின் 91வது பிறந்த நாளாகும். இதையொட்டி அன்று மாலை 6 மணியளவில் சென்னை, ராயப்பேட்டை, ஒய்.எம்.சி.ஏ. மைதானத்தில் தென்சென்னை மாவட்ட தி.மு.க. சார்பில் பிறந்தநாள் விழாப் பொதுக்கூட்டம் நடைபெற உள்ளது.

தென்சென்னை மாவட்டக் கழகச் செயலாளர் ஜெ.அன்பழகன் தலைமையில் - கழகப் பொருளாளர் மு.க.ஸ்டாலின் முன்னிலையில் இக்கூட்டம் நடைபெறுகிறது.

இதில் கழகப் பொதுச்செயலாளர் அன்பழகன், தோழமைக் கட்சித் தலைவர்கள் - கழக முன்னணியினர் வாழ்த்துரை வழங்கிடவுள்ளனர். கட்சித் தலைவர் கருணாநிதி ஏற்புரை நிகழ்த்துகிறார்.

English summary

DMK chief Karunanidhi will celebrate his 91st birth day on June 3 amidst his party's debackle in the LS elections.