Just In

நீண்ட ஆயுளும், பரிபூரண வாழ்வும் பெற வேண்டும்... மோடிக்கு கருணாநிதி வாழ்த்து

Published: Wednesday, September 17, 2014, 13:04 [IST]

சென்னை: இன்று 64வது பிறந்தநாளைக் கொண்டாடும் பிரதமர் மோடிக்கு திமுக தலைவர் கருணாநிதி தனது வாழ்த்துகளைத் தெரிவித்துள்ளார்.

பிரதமர் நரேந்திர மோடி இன்று தனது 64வது பிறந்தநாளைக் கொண்டாடுகிறார். பிறந்தநாளையொட்டி மோடிக்கு உள்நாட்டு மற்றும் வெளிநாட்டுத் தலைவர்கள் பலர் தங்களது வாழ்த்துக்களைத் தெரிவித்து வருகின்றனர்.

அந்தவகையில், திமுக தலைவர் கருணாநிதி திமுக சார்பில் அனுப்பியுள்ள வாழ்த்துச் செய்தியில், ‘பிரதமர் நரேந்திர மோடிக்கு எனது மனமார்ந்த பிறந்தநாள் வாழ்த்துகளை தெரிவித்துக் கொள்கிறேன். உங்களுக்கு எனது இதயம் கனிந்த பிறந்த நாள் வாழ்த்துகள். நீங்கள் நீண்ட ஆயுளுடன் வாழவும், பரிபூரண வாழ்க்கையை பெறவும் வாழ்த்துகிறேன்' என இவ்வாறு அவர் தெரிவித்துள்ளார்.

வைகோ வாழ்த்து:

இதேபோல், ம.தி.மு.க. பொதுச்செயலாளர் வைகோ வெளியிட்டுள்ள வாழ்த்து செய்தியில் கூறி இருப்பதாவது:-

உங்களுடைய பிறந்த நாள் இன்னும் எண்ணற்ற முறை சிறப்பாக வருவதற்கு ம.தி.மு.க. சார்பில் இதயபூர்வமான வாழ்த்துக்களை தெரிவிப்பதில் மகிழ்ச்சி அடைகிறேன். நமது நாட்டை உயர்ந்த சிகரங்களுக்கு இட்டுச் செல்லும் வகையில் இந்திய நாட்டு மக்களின் தேவைகளையும் விருப்பங்களையும் நிறைவேற்றும் வகையில் புதிய விடியலை உருவாக்க நீங்கள் பல்லாண்டு பல்லாண்டு வாழ இயற்கை தாய் தனது அனைத்து ஆசிகளையும் வழங்க விழைக்கிறேன்.

இவ்வாறு அவர் தெரிவித்துள்ளார்.