தொண்டர்களைச் சந்திக்கிறார் கருணாநிதி.. ஜூன் 3ம் தேதி.. உறுதிப்படுத்தியது திமுக!

94வது பிறந்தநாளைக் கொண்டாட உள்ள திமுக தலைவர் கருணாநிதி, வரும் ஜூன் 3ம் தேதி திமுக தலைவர் கருணாநிதி தொண்டர்களை சந்திப்பார் என அறிவிக்கப்பட்டுள்ளது.

சென்னை: திமுக தலைவர் கருணாநிதி கடந்த 7 மாத காலமாக உடல்நலக்குறைவினால் பாதிக்கப்பட்டுள்ளார். மருத்துவமனையில் சிகிச்சை பெற்று வீடு திரும்பினாலும் மருத்துவர்களின் தொடர் கண்காணிப்பில் இருந்து வருகிறார். வீட்டில் உள்ள முக்கியமான உறுப்பினர்கள் மட்டுமே கருணாநிதியை சந்திக்கின்றனர்.

நோய் தொற்று ஏற்படும் என்பதால் பொது இடங்களில் நடைபெறும் நிகழ்ச்சிகளில் பங்கேற்பதில்லை. கருணாநிதி எப்போது நம்மை சந்திப்பார் என அக்கட்சியின் தொண்டர்கள் பெரும் ஆவலோடு எதிர்பார்த்து காத்திருந்தனர்.

அவருடைய பிறந்த நாளான ஜூன் 3 ஆம் தேதி தொண்டர்களை சந்திக்க வாய்ப்பு உள்ளதாக செய்திகள் வெளியாது, இதனால் தொண்டர்கள் பெரும் உற்சாகம் அடைந்து உள்ளனர். கடந்த வாரம் செய்தியாளர்களிடம் பேசிய மு.க.ஸ்டாலின் பேசுகையில், திமுக தலைவர் கருணாநிதி உடல்நிலையில் நல்ல முன்னேற்றம் ஏற்பட்டு வருகிறது. மருத்துவர்கள் அனுமதி அளித்தால் தொண்டர்களை திமுக தலைவர் கருணாநிதி விரைவில் சந்திப்பார் என கூறினார்.

இந்த நிலையில் 94வது பிறந்தநாளன்று ராயப்பேட்டை ஒய்.எம்.சி.ஏ மைதானத்தில் நடக்கும் வைரவிழா நிகழ்ச்சியில் தொண்டர்களை கருணாநிதி சந்திப்பார் என திமுக அமைப்பு செயலாளர் ஆர்.எஸ்.பாரதி தெரிவித்துள்ளார். விழாவில் பீகார், ஒடிஷா உள்ளிட்ட பல்வேறு மாநில முதல்வர்கள் பங்கேற்பார்கள் என தகவல் வெளியாகியுள்ளது. திமுகவின் ஆர்.எஸ் பாரதி வெளியிட்டுள்ள அறிவிப்பு தொண்டர்களை உற்சாகமடைய வைத்துள்ளது.

English summary

DMK chief Karunanidhi will meet party cadres on June 3rd at YMCA ground on his 94th birth day function.