கட்ஜுவுக்கு இருக்கும் 'கட்ஸ்' கூட நமக்கு இல்லாமப் போச்சே!

Updated: Wednesday, January 13, 2016, 15:10 [IST]

Subscribe to Oneindia Tamil

சென்னை: முன்னாள் நீதிபதி மார்க்கண்டேய கட்ஜுவுக்கு இருக்கும் கட்ஸ் கூட நம்மவர்களுக்கு இல்லை என்பது நாளுக்கு நாள் ஆச்சரியத்தை அதிகரித்து வருகிறது. ஜல்லிக்கட்டுக்கு ஆதரவா்க அப்படிப் பேசி வருகிறார் கட்ஜு. அதேபோல ஜல்லிக்கட்டு எதிர்ப்பாளர்களை போட்டுத் தாக்கியும் வருகிறார்.

ஜல்லிக்கட்டு தொடர்பாக தொடர்ந்து தனது பேஸ்புக் பக்கத்தில் கருத்துக்கள், யோசனைகளைச் சொல்லி வருகிறார். ஆனால் இதில் ஒன்றைக் கூட தமிழக அரசு கவனிப்பதாக தெரியவில்லை.

தமிழக அரசே அவசரச் சட்டத்தைக் கொண்டு வரலாம், மத்திய அரசைக் கெஞ்ச வேண்டியதில்லை என்றும் அவர் ஐடியா கொடுத்தார். ஆனால் தமிழக அரசு அதைக் கண்டு கொள்ளவே இல்லை.

தமிழர்களுக்காக

தமிழர்கள் பிரச்சினையில் உள்ளனர். அவர்களுக்கு எனது யோசனைகள் தேவைப்படும் என்று கூறி தொடர்ந்து பதிவிட்டு வருகிறார் கட்ஜு தனது பேஸ்புக் பக்கத்தில்.

பீட்டாவுக்கு பொளேர் அடி

இந்த நிலையில் பீட்டா உள்ளிட்ட விலங்குகள் நல ஆர்வலர்களை சற்று முன்பு ஒரு பிடி பிடித்துளார் கட்ஜு. சொல் ஒன்றும் பேச்சு ஒன்றுமாக அவர்கள் இருப்பதாக சாடியுள்ளார் கட்ஜு.

சொகுசு வாழ்க்கை

இதுகுறித்து கட்ஜு போட்டுள்ள பதிவில், விலங்குகள் நல ஆர்வலர்கள் என்று கூறிக் கொள்ளும் பலரும் சொகுசு வாழ்க்கை வாழ்ந்து வருபவர்கள். ஆடம்பரமாக வாழ்ந்து வருபவர்கள்.

பங்களாவாசிகள்

பெரிய பெரிய பங்களாக்கள், அடுக்குமாடிக் குடியிருப்புகளில் வாழ்ந்து வருபவர்கள். பெரிய பெரிய கார்களை வைத்துள்ளவர்கள். வங்கிகளில் பணத்தைக் கொட்டிக் குவித்து வைத்திருப்பவர்கள்.

சாதாரண மக்களைப் பற்றிக் கவலை இல்லை

இவர்களுக்கு சாதாரண மக்களைப் பற்றியெல்லாம் கவலை இல்லை. வறுமையைப் பற்றிக் கவலையில்லை. வேலையில்லாத் திண்டாட்டம் குறித்துக் கவலை இல்லை. ஊட்டச் சத்துக் குறைப்பாட்டால் குழந்தைகள் தவிப்பது குறித்துக் கவலை இல்லை.

விலங்குகளுக்காக மட்டும் உருகுவார்கள்

இப்படி எதைப் பற்றியும் கவலைப்படாத இவர்கள் விலங்குகளுக்காக மட்டும் ரத்தக் கண்ணீர் வடிப்பார்கள் என்று அந்தப் பதிவில் சாடியுள்ளார் கட்ஜு.

ஒப்புக்கு வருத்தம்

தனது பதிவில் கடைசியாக உருதுக் கவிஞர் அக்பர் அல்லாபதியின் வரி ஒன்றை மேற்கோள் காட்டியுள்ளார் கட்ஜு. அது.. மக்களோட கவலைகளை தீர்க்கிற மக்கள் தலைவருக்கு நாம ஆசைப்பட்டாலும், கிடைப்பது என்னவோ, ஆறுதல் சொல்லக் கூட தகுதியற்றவர்கள்தான்.