ஒரு மணி நேர இடைவேளைக்குள் 3 முதல்வர் வேட்பாளர்கள் வேட்புமனு தாக்கல்.. பரபரத்த தேர்தல் களம்!
சென்னை: முதல்வர் ஜெயலலிதா, திமுக தலைவர் கருணாநிதி, பாமக முதல்வர் வேட்பாளர் அன்புமணி ஆகியோர் இன்று வேட்புமனுக்களை தாக்கல் செய்ததால் தேர்தல் களம் பரபரப்பாக காணப்பட்டது.
தருமபுரி மாவட்டம் பென்னாகரத்தில் போட்டியிடும் பாமக இளைஞரணி செயலாளரும், அக்கட்சியின் முதல்வர் வேட்பாளருமான, அன்புமணி ராமதாஸ், மதியம் 12.10 மணியளவில் பென்னாகரம் வட்டாட்சியர் அலுவலகத்தில், தேர்தல் அதிகாரி மல்லிகாவிடம் வேட்புமனு தாக்கல் செய்தார்.
முன்னதாக நூற்றுக் கணக்கான தொண்டர்கள் புடைசூழ அவர் ஊர்வலமாக வட்டாட்சியர் அலுவலகத்திற்கு வந்தார்.
சென்னை ஆர்.கே.நகர் தொகுதியில் போட்டியிடும் ஜெயலலிதா இன்று மதியம் 12.25 மணியளவில் பழைய வண்ணாரப்பேட்டையில் உள்ள மாநகராட்சி மண்டல அலுவலகம் 4ல், தேர்தல் அதிகாரி பத்மஜா தேவியிடம் தனது வேட்புமனுவை தாக்கல் செய்தார். அப்போது சசிகலா உடன் இருந்தார்.
அதிமுக சார்பில் எஞ்சிய 226 தொகுதிகளில் போட்டியிடும் வேட்பாளர்கள் அனைவரும் 28ம் தேதி (வியாழக்கிழமை) ஒரே நாளில் தங்களது வேட்புமனுவை தாக்கல் செய்ய இருக்கின்றனர்.
அதேபோல திருவாரூரில் இன்று திமுக தலைவர் கருணாநிதி வேட்புமனு தாக்கல் செய்தார். திருவாரூர் அருகே காட்டூரில் உள்ள அவருடைய தாயார் அஞ்சுகத்தம்மாள் நினைவிடத்துக்கு இன்று காலை செல்ற கருணாநிதி பின்னர் மதியம் 12.45 மணி அளவில் திருவாரூர் உதவி கலெக்டர் அலுவலகத்தில் தேர்தல் நடத்தும் அலுவலர் முத்து மீனாட்சியிடம், வேட்புமனு தாக்கல் செய்தார்.
ஒரு மணிநேர இடைவேளைக்குள், மூன்று பெரிய கட்சிகளின் முதல்வர் வேட்பார்களும் வேட்புமனுக்களை தாக்கல் செய்தது குறிப்பிடத்தக்கது.
இதேபோல கோவில்பட்டி தொகுதியில் போட்டியிடும் வைகோ, காட்டுமன்னார்கோவில் தொகுதியில் போட்டியிடும் தொல்.திருமாவளவன் ஆகியோர் இன்று தங்கள் வேட்புமனுவை தாக்கல் செய்வதாக எதிர்பார்க்கப்பட்டது. இதில், வைகோ தனக்கு பதிலாக வேறு வேட்பாளரை களமிறக்கிவிட்டு, சட்டசபை தேர்தலில் போட்டியில்லை என்ற முடிவை அறிவித்துவிட்டார்.
Click it and Unblock the Notifications
Sign in with Google