தந்தை பெரியாரின் 43வது நினைவு தினம்.. ஸ்டாலின் உள்ளிட்ட தலைவர்கள் அஞ்சலி #Periyar

பகுத்தறிவு பகலவன் தந்தை பெரியாரின் 43வது நினைவு தினம் தமிழகத்தில் இன்று பல அரசியல் கட்சி தலைவர்களாலும் அனுசரிக்கப்பட்டது.

சென்னை: தந்தை பெரியாரின் 43வது நினைவு நாள் தினம் இன்று அனுசரிக்கப்படுகிறது. அரசியல் தலைவர்கள் பலரும் அவருக்கு அஞ்சலி செலுத்தினர்.

சென்னை அண்ணா சாலையில் உள்ள பெரியார் சிலை இன்று மலர் மாலை அணிவிக்கப்பட்டிருந்தது. தி.மு.க. பொதுச்செயலாளர் க.அன்பழகன், பொருளாளர் மு.க.ஸ்டாலின் ஆகியோர் அவரது சிலைக்கு மாலை அணிவித்து மரியாதை செலுத்தினார்கள். சிலைக்கு முன்பாக வைக்கப்பட்டிருந்த பெரியார் படத்திற்கு மலர் தூவி மரியாதை செலுத்தினர்.

இந்த நிகழ்ச்சியில், திமுக அமைப்புச் செயலாளர் ஆர்.எஸ்.பாரதி, முன்னாள் மத்திய அமைச்சர்கள் டி.ஆர்.பாலு, ஆ.ராசா, முன்னாள் அமைச்சர்கள் துரைமுருகன், பொன்முடி, எ.வ.வேலு, ரகுமான்கான், சுப்புலட்சுமி ஜெகதீசன், துணை பொதுச் செயலாளர் வி.வி.துரைசாமி, தொழிலாளர் அணி செயலாளர் சிங்கார ரத்தினசபாபதி, மாவட்ட செயலாளர்கள் ஜெ.அன்பழகன், மா.சுப்பிரமணியன், பி.கே.சேகர்பாபு, ஆர்.டி.சேகர், எம்.எல்.ஏ.க்கள் ப.ரங்கநாதன், ரவிச்சந்திரன், கு.க.செல்வம், தாயகம் கவி, வர்த்தகர் அணி கவிஞர் காசிமுத்து மாணிக்கம், வி.பி.மணி உள்பட ஏராளமான நிர்வாகிகள் பங்கேற்றனர்.

காங்கிரஸ் கட்சி சார்பில் அதன் மாநில தலைவர் திருநாவுக்கரசர் பெரியார் சிலைக்கு மாலை அணிவித்து மரியாதை செலுத்தினார். பிறகு நிருபர்களிடம் பேசிய அவர், அதிமுகவை தனது கைப்பாவையாக செயல்பட வைக்க மத்திய அரசு திட்டமிட்டுள்ளதாகவும், பாஜக தமிழக மண்ணில் வேரூன்ற மக்கள் அனுமதிக்க மாட்டார்கள் என்றும் தெரிவித்தார்.

காங். முன்னாள் தலைவர் ஈ.வி.கே.எஸ் இளங்கோவனும் பெரியார் சிலைக்கு மரியாதை செலுத்தினார். பிறகு நிருபர்களிடம் பேசுகையில், ஜெயலலிதா மரணம் குறித்து மாநில அரசு வெள்ளை அறிக்கை வெளியிட வேண்டும் என்று கேட்டுக்கொண்டார்.

விடுதலை சிறுத்தைகள் கட்சி தலைவர் திருமாவளவன், திராவிடர் கழக தலைவர் வீரமணி உள்ளிட்ட பல முக்கிய பிரமுகர்கள் பெரியார் நினைவு நாளையொட்டி மரியாதை செலுத்தினர்.

English summary

Leaders including M.K.Stalin pays tribute to Periyar statue as today is his 43th death year.