அதிமுக கூட்டத்தில் தள்ளுமுள்ளு.. உடைந்து விழுந்த பெரிய மின்விளக்கு.. காயமின்றி தப்பிய ராமராஜன்

சென்னை: சென்னையில் நடைபெற்ற அதிமுக பொதுக்கூட்டத்தின் போது மின்விளக்கு உடைந்து விழுந்ததில் நடிகர் ராமராஜன் அதிர்ஷ்டவசமாக காயமின்றி தப்பினார். அதிமுக தொண்டர்கள் 2 பேர் காயமடைந்தனர்.

சென்னை புதுவண்ணாரப்பேட்டை வஉசி நகரில், வடசென்னை மாவட்ட அதிமுக சார்பில் தமிழக அரசின் பட்ஜெட் விளக்க பொதுக்கூட்டம் நேற்று முன்தினம் இரவு நடைபெற்றது. வடசென்னை அதிமுக மாவட்ட செயலாளர் வெற்றிவேல் எம்எல்ஏ தலைமையில் நடைபெற்ற இக்கூட்டத்தில், சிறப்பு அழைப்பாளராக கலந்து கொண்ட நடிகர் ராமராஜன், பட்ஜெட் பற்றி விளக்கிப் பேசினார். கூட்ட மேடையில் அதிமுக நிர்வாகிகள் பலர் இருந்தனர்.

பின்னர் கூட்டம் முடிந்த நிலையில், ராமராஜன் மேடையிலிருந்து கீழே இறங்கி சென்றபோது, அவருடன் கைகுலுக்க தொண்டர்கள் போட்டிப்போட்டனர். இதனால், தள்ளுமுள்ளு ஏற்பட்டது. கூட்டத்தில் சிக்கிய ராமராஜனை அதிமுகவினர் பாதுகாப்பாக அழைத்துச் சென்றனர். அப்போது திடீரென அங்கிருந்த பெரிய மின்விளக்கு ஒன்று மேலிருந்து உடைந்து விழுந்தது. இதில் ராமராஜன் அதிர்ஷ்டவசமாக காயமின்றி தப்பினார்.

ஆனால், அதிமுக தொண்டர்கள் முனுசாமி (50), சிவானந்தம் (55) ஆகியோர் மீது மின்விளக்கு விழுந்ததில் அவர்களுக்கு தலையில் காயம் ஏற்பட்டது. இதையடுத்து அவர்கள் உடனடியாக ஸ்டான்லி மருத்துவமனையில் அனுமதிக்கப்பட்டனர். இது குறித்து போலீஸார் வழக்குப் பதிவு செய்து விசாரணை மேற்கொண்டுள்ளனர். இதனால் அங்கு சிறிது பரபரப்பு ஏற்பட்டது.

English summary

Light lamp Collapsed while ADMK General Meeting held in Chennai. After the ADMK meeting over, actor Ramarajan came out from the stage while People tried to hand shake to Ramarajan. Due to rush at the time, a light lamp collapsed and fall down there. In this incident Ramarajan escaped from injury and 2 people injured.