திண்டுக்கல் லோக்சபா தொகுதியில் எல்.கே. சுதீஷ் போட்டி?
திண்டுக்கல்: திண்டுக்கல் லோக்சபா தொகுதியில் தேமுதிக வேட்பாளராக எல்.கே.சுதீஷ் போட்டியிடக் கூடும் என்று கூறப்படுகிறது.
லோக்சபா தேர்தல் தேதி மற்றும் கூட்டணி தொகுதி பங்கீடு முடியும் முன்பே அதிமுக 40 தொகுதிகளுக்கும் வேட்பாளர்களை அறிவித்து தேர்தல் பிரச்சாரத்தை தொடங்கிவிட்டது. தேமுதிக எந்த கூட்டணியில் இடம்பெறும் என்பது இன்னமும் இழுபறியாகவே இருக்கிறது.
இந்நிலையில் திண்டுக்கல் லோக்சபா தொகுதியில் தேமுதிக சார்பில் விஜயகாந்த் மைத்துனர் எல்.கே.சுதீஷ் போட்டியிட உள்ளதாக கூறப்படுகிறது.
திண்டுக்கல் தொகுதியில் கடந்த 2009-ம் ஆண்டு தேர்தலில் தனித்து போட்டியிட்டு ஒரு லட்சத்து 740 வாக்குகளை பெற்றது தேமுதிக. தேமுதிக வேட்பாளராகப் போட்டியிட்ட முத்துவேல்ராஜ், வெளியூர்காரர். தொகுதி மக்களுக்கும், கட்சியினருக்கும் அறிமுகம் இல்லாத அவருக்கே இப்படி வாக்குகள் கிடைத்தன. தற்போது பாமக, மதிமுக, பாஜக மற்றும் சில கட்சிகளுடன் இணைந்து கூட்டணி பலத்துடன் போட்டியிட உள்ளதால் வெற்றி நிச்சயம் என்கின்றனர் தேமுதிக.வினர்.
இதனாலேயே திண்டுக்கல் தொகுதியில் போட்டியிட பிரேமலதா ஆர்வம் காட்டினார். ஆனால் அவர் தேர்தல் பிரச்சாரத்துக்காக தமிழகம் முழுவதும் சுற்றுப்பயணம் செல்வதால் அவரது சகோதரர் எல்.கே. சுதீஷ் போட்டியிடக் கூடும் எனத் தெரிகிறது.
எல்.கே.சுதீஷ் போட்டியிடுவார் என்பதாலேயே தேமுதிகவினர் உற்சாகமாக தேர்தல் பணிகளில் ஈடுபட்டும் வருகின்றனர்.
Click it and Unblock the Notifications
Sign in with Google