தமிழ்நாட்டில் 30 தொகுதிகளில் போட்டியிடும் மமதா பானர்ஜி கட்சி: 12ல் வேட்பாளர் பட்டியல்

சென்னை: லோக்சபா தேர்தலில் தமிழகத்தில் மமதா பானர்ஜியின் திரிணாமுல் காங்கிரஸ் கட்சி 30 தொகுதிகளில் போட்டியிடுகிறது.

இது குறித்து திரிணாமுல் காங்கிரஸ் தமிழ்நாடு மாநில தலைவர் சபீதா கூறுகையில்,

அகில இந்திய திரிணாமுல் காங்கிரஸ் கட்சி தமிழகத்தில் 30 தொகுதிகளில் போட்டியிட தீர்மானித்துள்ளது. வேட்பாளர்களை தேர்வு செய்யும் பணி கட்சியின் மேலிட பார்வையாளர் சலீம் மக்கார் முன்னிலையில் நடந்து வருகிறது.

வேட்பாளர் பட்டியல் வரும் 12ம் தேதி டெல்லியில் உள்ள ராம் லீலா மைதானத்தில் வைத்து கட்சியின் தலைவர் மமதா பானர்ஜி, முகுல்ராய் மற்றும் சமூக ஆர்வலர் அன்னா ஹஸாரே ஆகியோர் வெளியிடுகிறார்கள்.

வேலூர் தொகுதியில் எங்கள் கட்சிக்கு இந்திய யூனியன் முஸ்லிம் லீக் கட்சியின் அகில இந்திய தேசிய செயலாளர் ஏ.எஸ். பாத்திமா முசாபர் ஆதரவு தெரிவித்துள்ளார் என்றார்.

English summary

Mamata Banerjee's TMC will contest in 30 constituencies in TN in the forthcoming lok sabha election.