மகன், மருமகனுடன் ஹாங்காங் பறந்த ஸ்டாலின்... முதல்வர் வேட்பாளர் புரமோசன் அறிவிப்பு வருமா?

By Mayura Akilan

Updated: Wednesday, June 17, 2015, 13:21 [IST]

Subscribe to Oneindia Tamil

சென்னை: உடல் பரிசோதனைகளுக்காக ஆண்டுதோறும் லண்டன் சென்று வரும் ஸ்டாலின் இம்முறை ஹாங்காங் சென்றிருப்பதாக அரசியல் வட்டார தகவல்கள் தெரிவிக்கின்றன.

சகோதரரின் மகன் திருமணத்தை வெற்றிகரமாக முடித்த ஸ்டாலின் அதே குஷியோடு தனது மகன் உதயநிதி ஸ்டாலின், மருமகன் சபரீசனுடன் குழுவாக சென்றிருப்பதால் இந்த பயணம் அரசியல் முக்கியத்துவம் வாய்ந்ததாக கூறப்படுகிறது. ஒருவார காலம் ஸ்டாலின் குழுவினர் ஹாங்காங்கில் முகாமிட்டுள்ளதாக கூறப்படுகிறது.

2016 சட்டமன்ற தேர்தலுக்கு அனைத்து அரசியல் கட்சியினரும் தயாராகி வரும் நிலையில் திமுக பொருளாளர் ஸ்டாலினும் அதற்கேற்ப முன்னேற்பாடுகளை செய்யத்தொடங்கி விட்டார். சட்டமன்ற தேர்தலை முதல்வர் வேட்பாளர் என்ற புரமோசனுடன்தான் சந்திக்க வேண்டும் என்று திட்டத்தோடுதான் தமிழகம் திரும்புவாராம் ஸ்டாலின்.

மதுரை பொதுக்கூட்டத்திற்கு வந்த கூட்டத்தைப் பார்த்து உற்சாகமடைந்த ஸ்டாலின், திருச்சி அல்லது கோவையிலும் அதேபோல பொதுக்கூட்டத்தைக் கூட்ட முடிவு செய்துள்ளாராம். முதல்வர் வேட்பாளராக அறிவிக்கப்பட்டு விட்டால் அதே கெத்தோடு மாநிலம் முழுவதும் பிரம்மாண்ட கூட்டங்களை நடத்தலாம் எனவும் முடிவெடுத்துள்ளாராம் ஸ்டாலின். ஆனால் இந்த முடிவுக்கு கருணாநிதி கிரீன் சிக்னல் கொடுக்கும் மனநிலையில் இருந்தாலும் கூட்டணிக் கட்சிகளை மனதில் வைத்து தயக்கம் காட்டுவதாக கூறப்படுகிறது.

ஸ்டாலினின் ஹாங்காங் பயணம் நல்லதொரு திருப்பத்தை தருமா என்று எதிர்பார்க்கத் தொடங்கிவிட்டனர் அவரது ஆதரவாளர்கள்.