திமுக பொதுச்செயலர் அன்பழகன் 95-வது பிறந்த நாள்- ஸ்டாலின் உள்ளிட்டோர் வாழ்த்து
இன்று தனது 95-வது பிறந்த நாளை கொண்டாடும் தி.மு.க. பொதுச் செயலாளர் பேராசிரியர் அன்பழகனுக்கு மு.க.ஸ்டாலின் வாழ்த்து தெரிவித்துள்ளார்.
சென்னை: திமுக பொதுச் செயலாளர் பேராசிரியர் அன்பழகனின் 95-வது பிறந்த நாளையொட்டி, திமுக பொருளாளர் ஸ்டாலின் நேரில் சென்று தனது வாழ்த்துகளை தெரிவித்துள்ளார்.
தி.மு.க. பொதுச் செயலாளர் பேராசிரியர் அன்பழகன் இன்று 95-வது பிறந்தநாளை கீழ்ப்பாக்கத்தில் உள்ள வீட்டில் குடும்பத்தினருடன் கொண்டாடினார். தி.மு.க. பொருளாளர் மு.க.ஸ்டாலின் அன்பழகனுக்கு வீட்டுக்கு சென்று பொன்னாடை அணிவித்து வாழ்த்து தெரிவித்தார். மு.க.அழகிரி உள்ளிட்டோரும் அன்பழகனு்க்கு வாழ்த்து தெரிவித்துள்ளனர்.
இதுகுறித்து மு.க.ஸ்டாலின் வெளியிட்டுள்ள வாழ்த்து அறிக்கை:
கழகத்தினருக்கு கொள்கை வகுப்பெடுக்கும் பேராசிரியர். தலைவர் கருணாநிதியின் அரசியல் பயணத்தில் என்றென்றும் தோள் கொடுத்து துணை நிற்கும் தோழர். எமக்கு ஊக்கமளித்து ஆக்கப்பூர்வ ஆலோசனைகள் வழங்கும் நல்லாசான். இரு வண்ணக் கொடியும், பகுத்தறிவு-சுயமரியாதை கொள்கைகளும் காலத்தால் அழியாத செல்வங்கள்
என்பதை உணர்ந்து இலட்சிய வாழ்வு வாழும் பெருந்தகை. நூறாண்டு கடந்த திராவிட இயக்கத்தை 94 வயதிலும் கட்டிக்காக்கும் உறுதி மிக்க உள்ளம். முதுமையை வயதுக்கு மட்டும் அளித்துவிட்டு, சிந்தனையில் எப்போதும் இளமையாகவும் வலிமையாகவும் இருக்கும் பேராசிரியர் பெருந்தகை நூறாண்டு கடந்தும் நலமுடன் வாழ்ந்து கழகத்திற்கும் தலைவர் கருணாநிதிக்கும் என்றென்றும் துணை நிற்க வணங்குகிறேன். இவ்வாறு ஸ்டாலின் கூறியுள்ளார்.