நடிகர் சங்கம் கட்டிடம் கட்ட சென்னை ஹைகோர்ட் அதிரடி இடைக்கால தடை!

சென்னையில் நடிகர் சங்கத்துக்கான கட்டிடம் கட்ட சென்னை உயர்நீதிமன்றம் இடைக்கால தடை விதித்துள்ளது.

By Mathi

Updated: Saturday, May 6, 2017, 14:37 [IST]

Subscribe to Oneindia Tamil

சென்னை: நடிகர் சங்க கட்டிடம் கட்ட சென்னை உயர்நீதிமன்றம் இடைக்கால தடை விதித்து உத்தரவிட்டுள்ளது. அதேநேரத்தில் அஸ்திவாரம் அமைக்கும் பணிகளைத் தொடரலாம் எனவும் சென்னை உயர்நீதிமன்றம் உத்தரவிட்டுள்ளது.

நடிகர் சங்கத்துக்கான கட்டிடம் கட்டப்படும் இடத்தில் 33 அடி சாலை ஆக்கிரமிக்கப்பட்டுள்ளது என்பது புகார். இது தொடர்பாக அப்பகுதி குடியிருப்புவாசிகள் சார்பில் ஸ்ரீரங்கன் சென்னை போலீஸில் மனு கொடுத்திருந்தார்.

பின்னர் இது தொடர்பாக சென்னை உயர்நீதிமன்றத்திலும் வழக்கு தொடரப்பட்டது. இந்த வழக்கை நீதிபதிகள் கிருபாகரன் மற்றும் பார்த்திபன் ஆகியோர் விசாரித்தனர்.

அப்போது, சாலையை ஆக்கிரமித்து கட்டிடம் கட்ட வேண்டிய அவசியம் என்ன என்று நீதிபதிகள் கேள்வி எழுப்பியிருந்தனர். இவ்வழக்கில் நடிகர் சங்கம் பதிலளிக்கவும் உத்தரவிடப்பட்டிருந்தது.

இந்த வழக்கின் இன்றைய விசாரணையில் நடிகர் சங்கத்துக்கான கட்டிடம் கட்ட இடைக்கால தடை விதித்தது சென்னை உயர்நீதிமன்றம். அதே நேரத்தில் அஸ்திவாரம் அமைக்கும் பணிகளை தொடரலாம் எனவும் உயர்நீதிமன்ற நீதிபதிகள் தெரிவித்துள்ளனர்.