அதிமுக ஒரு அணியின் மறைமுக ஆதரவாளர்களாக மாறிய இணையதள மதிமுக விசுவாசிகள்.. வைகோ திடுக்

இணையதள மதிமுக விசுவாசிகள் அதிமுக ஒரு அணியின் மறைமுக ஆதரவாளர்களாக மாறிய ரகசியம் தமக்கு தெரியும் என வைகோ தெரிவித்திருப்பது பரபரப்பை ஏற்படுத்தியுள்ளது.

By Mathi

Published: Monday, September 4, 2017, 8:52 [IST]

ஒட்டன்சத்திரம்: இணையதளங்களில் தம்மை பற்றி விமர்சிக்கும் மதிமுக விசுவாசிகள் அதிமுகவின் ஒரு குழுவின் ஆதரவாளர்களாக மாறிய ரகசியம் எனக்கு தெரியும் என மதிமுக பொதுச்செயலர் வைகோ திடுக்கிடும் தகவலை வெளியிட்டுள்ளார்.

திமுக தலைவர் கருணாநிதியை வைகோ அண்மையில் சந்தித்து நெகிழ்ச்சியுடன் பேட்டியளித்தார். இதையடுத்து முரசொலி பவள விழாவில் வைகோ பங்கேற்கிறார் எனவும் அறிவிக்கப்பட்டுள்ளது.

MDMK men supporting AIADMK faction, says Vaiko

இதை மதிமுக விசுவாசிகள் சமூக வலைதளங்களில் விமர்சித்து வருகின்றனர். இதை குறிப்பிட்டு ஒட்டன்சத்திரத்தில் நேற்று நடைபெற்ற திருமணவிழாவில் வைகோ பேசினார்.

அப்போது, இணையதளங்களில் எழுதுகிறார்களே...அவர்களுக்கு நான் சொல்கிறேன். நான் சர்வாதிகாரி அல்ல... அண்ணா திமுகவில் 3 குழுவாகிவிட்டது... நீங்கள் அண்ணா திமுகவின் ஒரு குழுவின் ஆதரவாளர்களாக மாறிய ரகசியம் எனக்கு தெரியும்.

ஒற்றனுக்கும் ஒற்றனை வைத்து நிலைமைகளை தெரிந்து கொண்டு அதிகாரம் செய்ய வேண்டும் என்று வள்ளுவர் சொல்லியிருக்கிறார். நான் ஒற்றர்களை வைக்கவில்லை. செய்திகளைத் தருகிறவர்களை வைத்திருக்கிறேன்..இன்று இணையதளத்திலே என்னை பழித்து கூறுகிற நீங்கள் எல்லோரும் அண்ணா திமுகவின் ஒரு குறிப்பிட்ட அணியின் மறைமுக ஆதரவாளர்களாக மாறிய உண்மை எனக்கு தெரியும் என்றார் வைகோ.