அண்ணா பல்கலை எங்களிடம் கேட்கவே இல்லை.. பி.இ தமிழ் வழிப் பாடப்பிரிவுகள் மூடப்படாது.. பொன்முடி அதிரடி
சென்னை: பொறியியல் கல்லூரிகளில் தமிழ் வழிப் பாடப்பிரிவுகள் மூடப்படுவதாக அண்ணா பல்லைக்கழகம் அறிவித்திருந்த நிலையில், தற்போது இந்த அறிவிப்பு வாபஸ் பெறப்பட்டிருக்கிறது. பொறியியல் கல்லூரிகளில் தமிழ் வழிப் பாடப்பிரிவுகள் மூடப்படாது என அமைச்சர் அமைச்சர் பொன்முடி கூறியுள்ளார்.
கடந்த திமுக ஆட்சியில் மு.கருணாநிதி முதலமைச்சராக இருந்தபோது, தாய் மொழி வழிக்கல்வி குறித்து பல்வேறு அறிவிப்புகள் வெளிவந்தன. அதில் முக்கியமானது அண்ணா பல்கலைக்கழக வளாக கல்லூரிகளில் சிவில், மெக்கானிக்கல் உள்ளிட்ட சில பாடப்பிரிவுகள் தமிழ் வழியில் வழங்கப்படும் என்கிற அறிவிப்புதான். இந்நிலையில், சமீபத்தில் அண்ணா பல்கலைக்கழகத்தின் 11 உறுப்பு கல்லூரிகளில் தமிழ் வழி பாடப்பிரிவுகள் தற்காலிகமாக நீக்கம் செய்யப்படுவதாக அண்ணா பல்கலைக்கழக நிர்வாகம் அறிவித்தது.
இதற்கு போதுமான மாணவர்கள் ஆதரவு இல்லை என்று சொல்லப்பட்டது. அண்ணா பல்கலையின் இந்த நடவடிக்கைக்கு அரசியல் கட்சியினர் கடும் எதிர்ப்பு தெரிவித்தனர். இதனையடுத்து தற்போது இந்த முடிவு வாபஸ் பெறப்பட்டுள்ளது. இது குறித்து விளக்கமளித்த அமைச்சர் பொன்முடி, "தமிழ்நாடு அரசுக்கே தெரியாமல் அண்ணா பல்கலைக்கழகம் இதுபோன்ற அறிவிப்பை வெளியிட்டுள்ளது. பொறியியல் கல்லூரிகளில் தமிழ் வழிப் பாடப்பிரிவுகள் மூடப்படாது.
எத்தனை பேர் படிக்கிறார்கள் என்பது முக்கியமல்ல, தாய் மொழியில் படிக்க வேண்டியது முக்கியம். பொறியியல் கல்லூரிகளில் தமிழ் வழி பாடப்பிரிவுகள் மூடப்படாது என அண்ணா பல்கலை. அறிவித்துள்ளது" என்று கூறியுள்ளார்.
Click it and Unblock the Notifications
Sign in with Google