தேமுதிகவில் சேர மு.க. அழகிரி ரெடியாம்... பார்த்தசாரதி 'சீரியஸ்' பேச்சு
சென்னை: தேமுதிகவில் சேர திமுக தலைவர் கருணாநிதி மகன் மு.க. அழகிரி தயாராக இருப்பதாக அக்கட்சியின் தலைமை நிலையச் செயலர் பார்த்தசாரதி தெரிவித்துள்ளார்.
சட்டசபை தேர்தல் களம் அனல் பறந்த போதிருந்தே தேமுதிக கலகலக்க ஆரம்பித்தது. தேமுதிக மாவட்ட செயலர்கள் உள்ளிட்ட நிர்வாகிகள் பலரும் அதிமுக, திமுகவுக்கு தாவி வருகின்றனர்.
இந்த நிலையில் தேமுதிகவின் தலைமை நிலையச் செயலர் பார்த்தசாரதி செய்தியாளர்களிடம் பேசுகையில், தேமுதிகவில் இருந்து யார் வேண்டுமானாலும் போகட்டும். ஆனால், உண்மையான தொண்டர்கள் தொடர்ந்து இருப்பர்.
திமுகவில் விஜயகாந்த்?
5 முறை ஆட்சிக்கு வந்ததாக பேசிக் கொள்கிற திமுக, கீழ்த்தரமான வேலைபார்த்து எங்களது கட்சியைச் சேர்ந்தவர்களை இழுத்து வருகின்றனர். அத்துடன் பிரேமலதா சொன்னால் விஜயகாந்த் திமுகவில் சேருவார் என்றெல்லாம் கூறுகின்றனர்.
தேமுதிகவில் அழகிரி...
உண்மையில் திமுக தலைவர் கருணாநிதியின் மகன் மு.க. அழகிரிதான் தேமுதிகவில் சேருவதற்கு தயாராக இருக்கிறார். விஜயகாந்த் விஜயகாந்த் உத்தரவிட்டால் உடனடியாக அழகிரி சேருவார் என்றார்.
விஜயகாந்தை எதிர்த்த அழகிரி
கடந்த லோக்சபா தேர்தலில் தேமுதிகவை திமுக கூட்டணிக்கு கொண்டு வருவதில் மு.க.ஸ்டாலின் மும்முரமாக இருந்தார். விஜயகாந்தும் திமுக அணிக்கு வருவதற்கு சிக்னல் கொடுத்திருந்தார். ஆனால் அப்போது விஜயகாந்தை கடுமையாக மு.க. அழகிரி விமர்சித்திருந்தார்.
பார்த்தா சீரியஸ் பேச்சு
இதனால் தேமுதிக- திமுக கூட்டணி உருவாகவில்லை. இதனைத் தொடர்ந்தே அழகிரி ஓரங்கட்டப்பட்டு திமுகவில் இருந்தே நீக்கப்பட்டார். இந்த நிலையில் தேமுதிக தலைமை நிலையச் செயலர் பார்த்தசாரதி, தேமுதிகவில் மு.க. அழகிரி சேருவார் என சீரியசாகவே கூறிக் கொண்டிருப்பது குறிப்பிடத்தக்கது.
Click it and Unblock the Notifications
Sign in with Google