திட்டமிட்டபடி 16-ந் தேதி அமெரிக்கா போகிறார் அழகிரி?

மதுரை: திமுகவில் இருந்து நிரந்தரமாக நீக்கப்பட்டுவிட்ட மு.க. அழகிரி வரும் 16-ந் தேதியன்று திட்டமிட்டபடி அமெரிக்கா செல்வாரா? அல்லது மதுரையில் கருணாநிதியை சந்தித்து பரபரப்பை ஏற்படுத்துவாரா? என்று அவரது ஆதரவாளர்கள் ஆவலுடன் காத்திருக்கின்றனர்.

திமுகவில் இருந்து நிரந்தரமாக நீக்கப்பட்டுவிட்டார் மு.க. அழகிரி. ஆனாலும் நான் திமுக காரன்.. எனக்கு எப்போதுமே கருணாநிதிதான் தலைவர் என்று அதிரடி பேட்டிக் கொடுத்து வருகிறார் மு.க. அழகிரி.

அத்துடன் மதுரைக்கு வரும் கருணாநிதியை நான் சந்திப்பேன்..அப்போது அவரையே கட்சியை விட்டு நீக்கினாலும் நீக்கிவிடுவார்கள் என்றும் அழகிரி கூறினார். இதனிடையே மு.க. அழகிரியை பேசாமல் அமெரிக்காவுக்குப் போய் விடச் சொல்லுங்கள் என்று திமுக தலைவர் கருணாநிதியும் எச்சரித்ததாக கூறப்படுகிறது.

சமரச முயற்சி?

இந்த நிலையில் தயாளு அம்மாளையும் ராஜாத்தி மற்றும் கனிமொழியையும் அழகிரி சந்தித்துப் பேசினார். ஆனால் மு.க. அழகிரியுடன் எந்த ஒரு சமாதானத்தையும் மேற்கொள்ளக் கூடாது என்பதில் மு.க. ஸ்டாலின் உறுதியாக இருக்கிறாராம்.

லண்டனுக்குப் போவேன்

அப்படி ஏதாவது மு.க. அழகிரியுடன் மீண்டும் இணக்கமாக சமாதானத்தை உருவாக்க நினைத்தால் தாம் மருத்துவ பரிசோதனைக்காகவும் ஓய்வெடுக்கவும் லண்டனுக்குப் போய்விடுவேன் என்று ஸ்டாலின் தன் பங்குக்கு மிரட்டல் விடுத்ததாக கூறப்படுகிறது.

செல்வி தூது?

வழக்கமாக கருணாநிதி குடும்ப பிரச்சனைகளில் தூதராக செயல்படும் கருணாநிதியின் மகள் செல்வி இம்முறை அத்தகைய முயற்சி எதனையும் மேற்கொள்ளவும் இல்லை. இதற்கு காரணமும் ஸ்டாலின் மற்றும் அவரது மனைவி துர்காவின் கடுமைதான் எனக் கூறப்படுகிறது.

ஓங்கும் ஸ்டாலின் கை

தற்போதைய நிலையில் திமுகவில் கருணாநிதி குடும்பத்தில் ஸ்டாலின் ஆதிக்கமே இருக்கிறது. இது அப்படியே நீடிக்க வேண்டும் என்பதில் ஸ்டாலின் குடும்பத்தினரும் ஆதரவாளர்களும் மிக உறுதியாக இருந்து 'செக்' வைத்துக் கொண்டே இருக்கின்றராம்.

English summary

DMK rebel leader and Southern Districts Strong man MK Azhagiri supporeters said that he will go to America on April 16th to avoid his father and DMK leader Karunanidhi's Madurai Visit.