போனில் வாழ்த்திய ஸ்டாலின்: கருணாநிதியின் உடல்நலம் பற்றி விசாரித்த மோடி
சென்னை: பிரதமராக பதவியேற்கும் நரேந்திர மோடிக்கு திமுக பொருளாளர் மு.க. ஸ்டாலின் தொலைபேசி மூலம் வாழ்த்து தெரிவித்துள்ளார்.
நாடாளுமன்ற தேர்தலில் பாஜக தலைமையிலான தேசிய ஜனநாயக கூட்டணி தனிப்பெரும்பான்மையுடன் வெற்றி பெற்றுள்ளது. இதையடுத்து தேசிய ஜனநாயக கூட்டணி மத்தியில் ஆட்சி அமைக்கவிருக்கிறது. இந்தியாவின் 14வது பிரதமராக நரேந்திர மோடி வரும் 21ம் தேதி பதவி ஏற்கவிருக்கிறார்.
புதிய பிரதமராகப் போகும் மோடிக்கு பல்வேறு கட்சி தலைவர்கள், பல்வேறு நாட்டு தலைவர்கள் வாழ்த்து தெரிவித்து வருகின்றனர். இந்நிலையில் திமுக பொருளாளர் மு.க. ஸ்டாலின் மோடியை தொலைபேசியில் தொடர்பு கொண்டு வாழ்த்து தெரிவித்துள்ளார். பதிலுக்கு மோடி ஸ்டாலினிடம் திமுக தலைவர் கருணாநிதியின் உடல்நலம் குறித்து விசாரித்துள்ளார்.
முன்னதாக வாக்குகள் எண்ணப்பட்டு தேர்தல் முடிவுகள் அறிவிக்கப்பட்ட உடனேயே ஸ்டாலின் மோடிக்கு ட்விட்டர் மூலம் வாழ்த்து தெரிவித்திருந்தார் என்பது குறிப்பிடத்தக்கது.