திமுகவில் இனி எல்லாமே ஸ்டாலின் மயம்!

By Mathi

Published: Friday, January 24, 2014, 16:44 [IST]

Subscribe to Oneindia Tamil

சென்னை: மு.க. அழகிரியை நீக்கியதன் மூலம் திமுகவில் இனி அனைத்துமே ஸ்டாலின் மயம் என்ற நிலை உருவாகிவிட்டது.

திமுகவை உருவாக்கியது அண்ணா, நெடுஞ்செழியன் உட்பட மூத்த தலைவர்கள்.. அண்ணா மறைவுக்குப் பிறகு எம்.ஜி.ஆர் போன்ற தலைவர்கள் இருந்தாலும் மெல்ல மெல்ல திமுகவை வசமாக்கினார் கருணாநிதி.

எம்.ஜி.ஆர் நீக்கத்துக்குப் பின்னர் திமுக என்றால் கருணாநிதி என்றானது. 1980களில் திமுக என்றால் கருணாநிதி அவரது அக்காள் மகன் முரசொலி மாறன் மட்டும்தான் என்றானது.

வைகோ நீக்கம்

அப்போது மெல்ல மெல்ல தலைஎடுத்துக் கொண்டிருந்தார் ஸ்டாலின். ஸ்டாலின் வளர்ச்சிக்கு வைகோ தடையாக இருக்க அவரும் நீக்கப்பட்டார்.

கோதாவில் குதித்த அழகிரி

பின்னர் ஸ்டாலினுக்குப் போட்டியாக அவரது அண்ணன் மு.க. அழகிரி கோதாவில் குதித்தார்.

தயாநிதி, கனிமொழி

மு.க. அழகிரி கோதாவில் குதித்துக் கொண்டிருக்க முரசொலி மாறன் மறைந்து போனார். அவரது மறைவைத் தொடர்ந்து தயாநிதி மாறன் அரசியலுக்கு வந்தார். அதேபோல் கருணாநிதியின் மகள் கனிமொழியும் அரசியலுக்கு கொண்டுவரப்பட்டார்.

ஸ்டாலின் அணியில் தயாநிதி

இதனால் மு.க. அழகிரி, தயாநிதி, கனிமொழி ஆகிய குடும்ப உறுப்பினர்களை எதிர்கொள்ள வேண்டிய கட்டாயத்துக்கு தள்ளப்பட்டார் ஸ்டாலின். பின்னாளில் தயாநிதி, ஸ்டாலின் அணியில் இணைந்துவிட்டார். ஒரு கட்டத்தில் கனிமொழியும் ஸ்டாலின் ஆதரவாளராக இருந்தார்.

முரசொலி, கலைஞர் டிவி

அதேபோல் திமுகவின் அதிகாரப்பூர்வ ஏடான முரசொலி, கருணாநிதி குடும்பத்து தொலைக்காட்சியான கலைஞர் டிவி போன்றவற்றிலும் ஸ்டாலினின் செல்வாக்கு கட்டுக்குள்தான் இருந்தது. ஸ்பெக்ட்ரம் விவகாரத்துக்குப் பின்னர் மெல்ல மெல்ல கலைஞர் டிவியின் பிடி ஸ்டாலினுக்குள் நகர நகர இப்போது முழுமையாக அவரது கட்டுக்குள் இருக்கிறது.

இதேபோல்தான் முரசொலி ஏட்டின் நிலைமையும். முரசொலி நிர்வாகமும் ஸ்டாலின் கட்டுப்பாட்டில் வந்துவிட்டதாக கூறப்படுகிறது. திமுக தலைமையகமான அறிவாலயத்தில் கருணாநிதி குடும்பத்து உறுப்பினர்கள் ஆதரவாளர்கள் பலரும் இருந்தாலும் தற்போது ஸ்டாலினின் ஆதரவாளர்களே அதிகம்.

இந்நிலையில் கட்சியில் தமக்கு எதிராக கலகக் குரல் எழுப்பிக் கொண்டிருந்த அழகிரி நீக்கப்பட்டதைத் தொடர்ந்து கட்சி முழுமையாகவே ஸ்டாலினின் கட்டுப்பாட்டில் வந்துவிட்டது என்றே கூறப்படுகிறது.