மோடிக்கு பிறந்தநாள் வாழ்த்து: 'லைட்டா' குழப்பம் அடைந்த ராமதாஸ்
சென்னை: பிரதமர் மோடிக்கு வாழ்த்துக் கடிதம் அனுப்பிய பாமக நிறுவனர் டாக்டர் ராமதாஸ் பெறுநர் முகவரியில் திரு. கே. சந்திரசேகர் ராவ், பிரதமர் என்று எழுதியுள்ளார்.
பிரதமர் நரேந்திர மோடி இன்று தனது 64வது பிறந்தநாளை கொண்டாடினார். பிறந்தநாளையொட்டி மோடி குஜராத்தில் வசிக்கும் தனது தாய் ஹீரா பென்னை சந்தித்து அவரது காலில் விழுந்து ஆசி பெற்றார்.
இந்நிலையில் அவருக்கு பல்வேறு அரசியல் கட்சி தலைவர்கள், மாநில முதல்வர்கள் வாழ்த்துக் கடிதம் அனுப்பி உள்ளனர்.
பாமக நிறுவனர் டாக்டர் ராமதாஸும் மோடிக்கு வாழ்த்துக் கடிதம் அனுப்பியுள்ளார். அதில் அவர் கூறியிருப்பதாவது,
டியர் திரு நரேந்திர மோடி, வணக்கம்!
உங்களுக்கு எனது பிறந்தநாள் வாழ்த்துக்களை தெரிவித்துக் கொள்கிறேன். தேசத்திற்கு சேவை செய்யவும், அதை புதிய உயரத்திற்கு கொண்டு செல்லவும் நீங்கள் நீடித்த ஆயுளுடன் இருக்க வாழ்த்துகிறேன். இப்படிக்கு டாக்டர் எஸ். ராமதாஸ்
பெறுநர்
திரு. கே. சந்திரசேகர் ராவ்,
மதிப்பிற்குரிய இந்திய பிரதமர்,
7, ரேஸ் கோர்ஸ் ரோடு,
டெல்லி என்று அவர் அதில் தெரிவித்துள்ளார்.
கடிதத்தில் தெலுங்கானா முதல்வர் கே. சந்திரசேகர் ராவை இந்திய பிரதமர் என்று ராமதாஸ் தவறுதலாக குறிப்பிட்டுள்ளார்.