நடிகர் சங்கத் தேர்தலில் நல்லவர்களுக்கே என் ஆதரவு - விஜயகாந்த் அதிரடி
சென்னை: நடிகர் சங்கத் தேர்தலில் நல்லவர்களுக்கே என் ஆதரவு என்று முன்னாள் நடிகர் சங்கத் தலைவரும், தற்போதைய தமிழ்நாடு அரசின் எதிர்க்கட்சித் தலைவருமான விஜயகாந்த் தெரிவித்திருக்கிறார்.
விஜயகாந்த் தமிழ்நாடு முழுவதும் சுற்றுப்பயணம் செய்து ஏழை மக்களுக்கு நலத்திட்ட உதவிகள் வழங்கி வருகிறார். இன்று காலை தூத்துக்குடி செல்வதற்காக சென்னை விமான நிலையம் வந்தார்.
விமான நிலையத்தில் அவரை சூழ்ந்து கொண்ட செய்தியாளர்கள் நடிகர் சங்கத் தேர்தலில் உங்கள் ஆதரவு யாருக்கு என்று கேள்வி எழுப்பினர்.
"நடிகர் சங்க தேர்தலில் யாருக்கு ஆதரவு என்று சொல்வது சரியல்ல, வாக்களிப்பது ரகசியம். ஆனால் சங்க நலனில் அக்கறை இருக்கிறது. அதனால் நல்லவர்கள் ஜெயிக்க வேண்டும் நல்லவருக்கு என் ஆதரவு உண்டு" என்று தெரிவித்திருக்கிறார்.
தூத்துக்குடி மற்றும் ராமநாதபும் மாவட்டத்தில் சுற்றுப்பயணம் செய்வதற்காக விஜய்காந்த் இன்று காலை சென்னை விமான நிலையத்தில் இருந்து தூத்துக்குடிக்கு புறப்பட்டு சென்றார். அவருடன் மனைவி பிரேமலதாவும் உடன் சென்றிருக்கிறார்.
முன்னதாக விஜயகாந்தின் சமீபத்திய பிறந்த நாள் தினத்தில் விஷால் அணியினர் அவரைச் சந்தித்து வாழ்த்து தெரிவித்தது குறிப்பிடத்தக்கது.