சசிகலாவை தேர்வு செய்த உங்க தொகுதி அதிமுக எம்எல்ஏவிடம் கோபக்கணைகளை வீசுங்கள்- நெட்டிசன்கள்
சசிகலாவை விமர்சித்து வரும் நெட்டிசன்களின் கோபம் அதிமுக எம்.எல்.ஏ.க்கள் மீது திரும்பியுள்ளது.
சென்னை: சசிகலா மீதான விமர்சனங்களை கைவிட்டுவிட்டு அவரை முதல்வராக தேர்வு செய்த நீங்கள் வாக்களித்த உங்கள் தொகுதி அதிமுக எம்.எல்.ஏ.விடம் கோபக் கணைகளை வீசுங்கள் என்கிற நெட்டிசன்களின் பதிவுகள் வைரலாக ஷேர் ஆகிக் கொண்டிருக்கிறது.
அதிமுக பொதுச்செயலராக சசிகலா நியமிக்கப்பட்டதை அந்த கட்சி தொண்டர்கள் எவருமே சகிக்கவில்லை. தற்போது அதிமுக எம்.எல்.ஏ.க்கள் கூட்டத்தில் சட்டசபை குழு தலைவராக சசிகலா தேர்வு செய்யப்பட்டுள்ளார். இதை ஒட்டுமொத்த தமிழக மக்களுமே சசிக்கவில்லை.
ஆன்லைனில் மனு
சசிகலாவுக்கு எதிரான குரல்கள் நாளுக்கு நாள் வலுத்து கொண்டே வருகின்றன. சசிகலா முதல்வராவதைத் தடுக்க தமிழகத்தில் ஜனாதிபதி ஆட்சியை அமல்படுத்துங்கள் என்ற கோரிக்கையுடன் பல லட்சக்கணக்கானோர் ஜனாதிபதி பிரணாப் முகர்ஜிக்கு ஆன்லைனில் மனு போட்டுக் கொண்டிருக்கிறார்.
நெட்டிசன்கள்
திரும்பிய திசையெங்கும் சசிகலா மீதான விமர்சனங்களே... தற்போது சமூக வலைதளங்களில் சசிகலாவை நீங்க ஏன் விமர்சிக்க வேண்டும்; அவரை முதல்வராக்கிய உங்க தொகுதி எம்.எல்.ஏ.விடம் கோபத்தை காட்டுங்கள் என்கிற நெட்டிசன்களின் பதிவு சமூக வலைதளங்களில் வைரலாக ஷேர் ஆகிக் கொண்டிருக்கிறது.
எம்.எல்.ஏவிடம் காட்டுங்கள்...
இது தொடர்பான பதிவில் இடம்பெற்றுள்ளதாவது: ஒரு சின்ன யோசனை. நாம் எல்லாரும் இப்படி சசிகலாவை திட்டி தீர்ப்பதைவிட அவரை அங்கீகரித்து அவரை முதல்வராக ஏற்றுக்கொள்வதாக ஒப்புக்கொண்ட எம்.எல்.ஏ.க்கள் அனைவரும் மக்களால் ஓட்டு போட்டு தேர்ந்தெடுக்கப்பட்டவர்கள் தானே.... ஏன் ஒவ்வொரு தொகுதி மக்களும் ஒன்றுகூடி அவரவர் எம்.எல்.ஏ'வை நோக்கி உங்கள் கோவக்கனைகளை வீசக்கூடாது?? ஓட்டு போட்ட உங்களுக்கு அந்த உரிமை இருக்கிறது அல்லவா?? #Sasikala #SasikalaNotMyCm #SasikalaForCm.. இந்த பதிவை பலரும் ஷேர் செய்து வருகின்றனர்.
அதிர்ச்சியில் எம்.எல்.ஏ.க்கள்
ஏற்கனவே அதிமுக எம்.எல்.ஏ.க்கள் மீது அவர்களது ஆதரவாளர்களே கடும் கோபத்தில் இருக்கின்றனர். தற்போது சமூக வலைதளங்களிலும் பொதுமக்கள் கோபத்தை கொட்ட தொடங்கியுள்ளதால் அதிர்ந்து போயுள்ளது அதிமுக எம்.எல்.ஏ.க்கள் 'கூட்டம்'.