அதிமுக - திமுக வேண்டாம்; தேமுதிக உடன் கூட்டணி: இல.கணேசன் சூசகம்

புதுச்சேரி: அதிமுக, திமுக அல்லாத கட்சிகளுடன் இணைந்து லோக்சபா தேர்தலில் கூட்டணி அமைக்கப்படும் என்று பாஜகவின் மூத்த தலைவர் இல.கணேசன் கூறியுள்ளார்.

புதுவை தொழிலதிபர் சிவகுமார் பாரதீய ஜனதா கட்சியில் இணையும் நிகழ்ச்சியில் பங்கேற்பதற்காக கட்சியின் தேசிய குழு உறுப்பினர் இல.கணேசன் புதுவை வந்தார்.

அப்போது செய்தியாளர்களிடம் பேசிய அவர், வருகிற நாடாளுமன்றத் தேர்தலில் அதி.மு.க.- தி.மு.க. அல்லாத தே.மு.தி.க. உள்ளிட்ட கட்சிகளை ஒருங்கிணைத்து தேசிய ஜனநாயக கூட்டணி சார்பில் தமிழகம், புதுவையில் 40 தொகுதிகளிலும் வேட்பாளர்கள் போட்டியிடுவார்கள் என்றார்.

கூட்டணி தொடர்பாக புதுவை முதல்வர் ரங்கசாமியை சந்தித்து பேசுவீர்களா? என இல. கணேசனிடம் கேட்கப்பட்டது. அதற்கு பதிலளித்த இல. கணேசன், தற்போதைக்கு அந்த திட்டம் எதுவும் இல்லை என்றார்.

தேமுதிகவிற்கு வலை

தேமுதிகவை இழுக்க திமுக முயற்சி செய்து வருகிறது. திமுக தலைவர் கருணாநிதியே கூட்டணியில் தேமுதிக வந்தால் வரவேற்போம் என்று கூறினார்.

இதற்காக பேச்சு வார்த்தையும் நடைபெற்று வருகிறது. தமிழருவி மணியன், பாஜக அணியில் தேமுதிக, மதிமுக உள்ளிட்ட கட்சிகளை இணைக்க முயற்சி மேற்கொண்டு வருகிறார். இந்த நிலையில் பாஜகவில் தேசிய குழு உறுப்பினர் இல.கணேசன் தேமுதிக உடன் கூட்டணி சேர உள்ளதாக கூறியுள்ளார்.

English summary

"There is no possibility of BJP allying with DMK. In fact, we are looking for a new alliance without AIADMK and DMK," BJP national executive member Ila. Ganesan told.