நாடாளுமன்ற கட்டிடம் பார்த்தால் எப்படி இருக்கு தெரியுமா.. ஆஹா இந்த "ஆங்கிளில்" யாரும் யோசிக்கலியே!

Updated: Monday, May 29, 2023, 16:16 [IST]

Subscribe to Oneindia Tamil

சென்னை: முக்கோன வடிவில் கட்டப்பட்ட புதிய நாடாளுமன்ற கட்டிடத்தை பிரதமர் நரேந்திர மோடி நேற்று திறந்து வைத்த நிலையில், அதன் வடிவத்தை வேறு கோணத்தில் பார்த்து இருக்கிறார் பாஜகவின் அமர் பிரசாத் ரெட்டி. இது லிஸ்ட்லயே இல்லையே என்று பலரையும் சிந்திக்க வைத்துள்ளது அவரது பதிவு.

கடந்த 2020 ஆம் ஆண்டு டெல்லி பழைய நாடாளுமன்ற வளாகம் அருகே புதிய நாடாளுமன்றத்தை கட்டும் பணிக்கு பிரதமர் நரேந்திர மோடி அடிக்கல் நாட்டி வைத்தார். இந்த நிலையில் முக்கோண வடிவிலான அந்த நாடாளுமன்ற கட்டிடத்தின் கட்டுமானப் பணி நிறைவடைந்ததை அடுத்து பிரதமர் நரேந்திர மோடி நேற்று புதிய நாடாளுமன்றத்தை திறந்து வைத்து இருக்கிறார்.

New Parliament was constructed using Gomukha Architecture - BJP Amarprasad reddy

இந்த புதிய நாடாளுமன்றத்தின் வசதிகள், கட்டுமானக் கலை பற்றி பல்வேறு பாராட்டுக்களும் விமர்சனங்களும் எழுந்து இருக்கின்றன. குறிப்பாக பிரதமர் மோடி ட்விட்டரில் கடந்த சில நாட்களுக்கு முன் வெளியிட்ட புதிய நாடாளுமன்றத்தின் வீடியோவை பார்த்து பலரும் வியந்துபோயினர். அதன் கட்டுமானக் கலை குறித்து பல்வேறு கருத்துக்களும் பகிரப்பட்டன.

டிரோன் மூலம் புதிய நாடாளுமன்ற கட்டிடம், மக்களவை மற்றும் மாநிலங்களவை அரங்குகளின் வீடியோக்கள் பதிவு செய்யப்பட்டு வெளியிடப்பட்டன. அப்போது இரு அவைகளின் இருக்கை அமைப்பும் திமுகவின் உதயசூரியன் சின்னத்தைபோல் இருப்பதாக நெட்டிசன்கள் கருத்திட்டு வந்தனர்.

இந்த நிலையில், நேற்று பிரதமர் நரேந்திர மோடி புதிய நாடாளுமன்றத்தில் உரையாற்றியபோது, "தேசிய பறவையான மயில் போன்ற அமைப்பில் லோக் சபா அரங்கு உருவாக்கப்பட்டது. இந்தியாவின் தேசிய மலரான தாமரையின் உருவ அமைப்பைபோல் ராஜ்ய சபா போன்றும் வடிவமைக்கப்பட்டு உள்ளதாக தெரிவித்தார்.

இதற்கிடையே பீகார் துணை முதலமைச்சர் தேஜஸ்வி யாதவின் ராஷ்டிரிய ஜனதா தளம் கட்சியின் ட்விட்டர் பக்கத்தில் புதிய நாடாளுமன்றத்தின் வடிவம் சவப்பெட்டியைபோல் இருப்பதாக விமர்சிக்கப்பட்டது. இதற்கு பாஜக உள்ளிட்ட கட்சிகள் எதிர்ப்பு தெரிவித்தனர். ஏ.ஐ.எம்.ஐ.எம் கட்சியின் அசதுத்தீன் உவைசியும் சவப்பெட்டியுடன் ஒப்பிட்டதை கண்டித்து இருந்தார்.

இந்த நிலையில் தமிழ்நாடு பாஜக தலைவர் அண்ணாமலையின் வலதுகரமான பாஜக மாநில விளையாட்டுப் பிரிவு தலைவர் அமர் பிரசாத் ரெட்டி, புதிய நாடாளுமன்ற கட்டிடத்தின் வடிவமைப்புக்கு புதிய விளக்கத்தை வழங்கி உள்ளார். அதில், புதிய நாடாளுமன்ற கட்டிடத்தின் படத்துக்கு அருகே பசுவின் படத்தை வைத்து, "புதிய நாடாளுமன்றம் பசு முக கட்டிடக் கலை கொண்டு கட்டப்பட்டது." என்று குறிப்பிட்டு உள்ளார்.