அதெல்லாம் அமைச்சரவையில் எந்த மாற்றமும் கிடையாது.. எடப்பாடி பொளேர் முடிவு!

தமிழக அமைச்சரவையில் இப்போதைக்கு எந்த மாற்றமும் இல்லை என்று முதல்வர் எடப்பாடி பழனிச்சாமி கூறியுள்ளார்.

By Mayura Akilan

Published: Saturday, May 27, 2017, 14:43 [IST]

Subscribe to Oneindia Tamil

சென்னை: தமிழக அமைச்சரவையில் இப்போதைக்கு எந்த மாற்றமும் செய்யப்பட மாட்டாது என்று முதல்வர் எடப்பாடி பழனிச்சாமி தெரிவித்துள்ளார்.

தமிழகத்தில் முதல்வர் எடப்பாடி பழனிசாமி தலைமையிலான அமைச்சரவையில் அவரையும் சேர்த்து 31 பேர் அமைச்சர்களாக உள்ளனர்.

கடந்த திங்கட்கிழமையும், செவ்வாய்க்கிழமையும் அதிருப்தி அ.தி.மு.க. முன்னாள் அமைச்சர்கள், எம்.எல்.ஏ.க்கள் தலைமை செயலகத்துக்கு சென்று முதல்வர் எடப்பாடி பழனிசாமியை சந்தித்து பேசினார்கள்.

தொகுதி பிரச்சினைகள் பற்றி அவர்கள் முதல்வருடன் ஆலோசனை நடத்தியதாக கூறப்பட்டாலும் உண்மையில் அவர்கள் தங்களுக்கு முக்கிய பதவி கேட்டே சென்றதாக கூறப்படுகிறது. இந்த நெருக்கடிகள் தொடர்பாக மூத்த அமைச்சர்களுடன் எடப்பாடி பழனிசாமி ஆலோசனை நடத்தினார்.

35 அமைச்சர்கள்

அரசியலமைப்பு சட்டப்படி ஒரு மாநிலத்தில் உள்ள மொத்த எம்.எல்.ஏ.க்கள் எண்ணிக்கையில் 15 சதவீதம் பேரை அமைச்சர்களாக நியமனம் செய்யலாம். அந்த அடிப்படையில் தமிழக அமைச்சரவையில் மொத்தம் 35 பேர் அமைச்சர்களாக இருக்க முடியும்.

சிலருக்கு வாய்ப்பு

எனவே மேலும் 4 பேரை அமைச்சரவையில் சேர்த்துக் கொள்ள முடியும். ஆகையால் தமிழக அமைச்சரவையில் மேலும் சிலருக்கு வாய்ப்பு அளிக்க எடப்பாடி பழனிசாமி ஆலோசனை நடத்தி வருவதாக தகவல் வெளியானது.

புதிய அமைச்சர்கள்

ஆட்சிக்கு ஏற்பட்டுள்ள அச்சுறுத்தல்களை நீக்கவும், அதிருப்தியாளர்களை சமரசம் செய்யவும் 3 பேர் அமைச்சர்களாக சேர்க்கப்பட உள்ளனர். விரைவில் இந்த அமைச்சரவை மாற்றம் நடைபெறும் என்று தகவல் வெளியானது.

மாற்றமில்லை

தங்கத்தமிழ் செல்வன் நிதியமைச்சராக நியமனம் செய்யப்படலாம் என்றும் கூறப்பட்ட நிலையில், தற்போதைக்கு அமைச்சரவை மாற்றமில்லை என்று முதல்வர் எடப்பாடி பழனிச்சாமி தெரிவித்துள்ளார்.

இணைப்பு பேச்சுவார்த்தை

அதிமுகவின் இரு அணிகளை இணைக்க பேச்சுவார்த்தை நடக்கிறது என்றும் முதல்வர் எடப்பாடி பழனிச்சாமி கூறியுள்ளார். ஒருவேளை இணைப்பு பேச்சுவார்த்தை சுமூகமாக முடிந்த பின்னர் அமைச்சரவையில் மாற்றம் செய்யப்படலாம் என்றும் கூறப்படுகிறது.