ஓ.பன்னீர் செல்வத்தின் 5வது பட்ஜெட்... முதல்வராக முதல் பட்ஜெட் தாக்கல்!

Updated: Wednesday, March 25, 2015, 10:22 [IST]

Subscribe to Oneindia Tamil

சென்னை: 2வது முறையாக முதல்வராகியுள்ள ஓ.பன்னீர் செல்வம். இன்று தனது முதல் பட்ஜெட்டைத் தாக்கல் செய்தார். அதேசமயம், நடப்பு தமிழக அமைச்சரவையில் நிதியமைச்சராக அவர் தாக்கல் செய்வது இது 5வது பட்ஜெட்டாகும்.

2015 -16 ம் ஆண்டுக்கான நிதி நிலை அறிக்கையை ஓ.பன்னீர்செல்வம் இன்று தமிழக சட்டசபையில் தாக்கல் செய்தார்.

இது நடப்பு அதிமுக அரசில் நிதியமைச்சராக ஓ.பன்னீர் செல்வம் தாக்கல் செய்துள்ள 5வது பட்ஜெட்டாகும். அதேசமயம், 2வது முறையாக முதல்வராகியுள்ள அவர் தாக்கல் செய்துள்ள முதல் பட்ஜெட்டாகும்.

ஜெயலலிதா தலைமையில் அதிமுக அரசு, கடந்த 2011ம் ஆண்டு மே மாதம் பொறுப்பேற்றது.

2011 - 12ம் ஆண்டுக்கான முழு பட்ஜெட் 2011ம் ஆண்டு ஆகஸ்டு மாதம் தாக்கல் செய்யப்பட்டது.

2012- 13, 2013- 14 ம் ஆண்டுகளுக்கான பட்ஜெட்களும் அந்தந்த ஆண்டுகளில் தாக்கல் செய்யப்பட்டன.

2014- 15ம் ஆண்டுக்கான பட்ஜெட் கடந்த ஆண்டு பிப்ரவரி 13ம் தேதி தாக்கல் செய்யப்பட்டது.

4 பட்ஜெட்டுகளையும் நிதியமைச்சராக ஓ.பன்னீர்செல்வம் தாக்கல் செய்தார்.

இந்த ஆண்டுக்கான பட்ஜெட்டை அவர் நிதியமைச்சர் மற்றும் முதல்வர் பொறுப்பில் இருந்து தாக்கல் செய்தார்.

முதல்வர் ஒருவர் தமிழகத்தில் பட்ஜெட்டைத் தாக்கல் செய்வது 2000மாவது ஆண்டுக்குப் பிறகு இதுவே முதல் முறையாகும்.

2000- 2001ம் ஆண்டுக்கான பட்ஜெட்டை அப்போதைய முதல்வர் கருணாநிதி தாக்கல் செய்தார். 14 ஆண்டுகளுக்கு பிறகு இப்போது முதல்வராக இருக்கும் ஓ.பன்னீர் செல்வம் தாக்கல் செய்துள்ளார்.

அதிமுக ஆட்சியின் கடைசி பட்ஜெட்டாகும் இது. 2016ம் ஆண்டு மே மாதம் அதிமுக அரசின் ஆட்சி காலம் முடிகிறது. எனவே அடுத்த ஆண்டு பட்ஜெட் இடைக்கால பட்ஜெட்டாகவே இருக்கும்.