பெட்ரோல், டீசல் விலை நள்ளிரவு முதல் அதிகரிப்பு; சென்னையில் விலை எவ்ளோ தெரியுமா?

டெல்லி: பெட்ரோல் விலை லிட்டருக்கு 3.13 ரூபாயும், டீசல் 2.71 ரூபாயும் அதிகரித்துள்ளது. இந்த விலை உயர்வு வெள்ளிக்கிழமை நள்ளிரவு முதல் அமலுக்கு வந்துள்ளது. சென்னையில் ஒரு லிட்டர் பெட்ரோல் 69 ரூபாய் 45 காசாக உயர்ந்துள்ளது. அதேபோல் ஒரு லிட்டர் டீசல் விலை 55 ரூபாய் 74 காசாக அதிகரித்துள்ளது.

பெட்ரோல், டீசல் விலையை நிர்ணயிக்கும் அதிகாரம், பொதுத்துறை எண்ணெய் நிறுவனங்களுக்கு அளிக்கப்பட்டுள்ளது. அதன்படி, சர்வதேச சந்தையில் கச்சா எண்ணெய் விலை நிலவரம், அமெரிக்க டாலருக்கு நிகரான ரூபாய் மதிப்பு ஆகியவற்றின் அடிப்படையில் 15 நாட்களுக்கு ஒருமுறை, பெட்ரோல், டீசல் விலையை எண்ணெய் நிறுவனங்கள் மாற்றி அமைத்து வருகின்றன.

கடந்த ஆகஸ்டு மாதத்தில் இருந்து பிப்ரவரி 1ஆம் தேதிவரை, பெட்ரோல் விலை 10 முறையும், அக்டோபர் மாதத்தில் இருந்து பிப்ரவரி 1ஆம் தேதிவரை, டீசல் விலை 6 முறையும் குறைக்கப்பட்டு வந்தது. இதன்மூலம், பெட்ரோல் விலை லிட்டருக்கு மொத்தம் 17ரூபாய்.11பைசாவும் டீசல் விலை மொத்தம் 12ரூபாய் 96 பைசாவும் குறைந்தது.

விலை உயர்வு

பிப்ரவரி 16ஆம் தேதியும், மார்ச் 1ஆம்தேதியும் பெட்ரோல், டீசல் விலை திடீரென உயர்த்தப்பட்டது. பிறகு, ஏப்ரல் 2 மற்றும் 16ஆம்தேதிகளில் பெட்ரோல், டீசல் விலை மீண்டும் குறைக்கப்பட்டது. ஆனால், ஏப்ரல் 30 ஆம் தேதி பெட்ரோல் விலை லிட்டருக்கு 3 ரூபாய்96பைசா (உள்ளூர் வரிகளை சேர்க்காமல்) உயர்த்தப்பட்டது. டீசல் விலை லிட்டருக்கு 2 ரூபாய் 37 பைசா அதிகரிக்கப்பட்டது.

மீண்டும் உயர்வு

‘இந்த நிலையில் 15 நாட்களுக்குப் பின்னர் பெட்ரோல் விலை லிட்டருக்கு 3 ரூபாய் 13 பைசாவும் டீசல் விலை லிட்டருக்கு 2ரூபாய்71 பைசவும் உயர்த்தப்பட்டுள்ளது. இந்த விலை உயர்வு நள்ளிரவு முதல் அமலுக்கு வந்துள்ளது.

சென்னையில் விலை எவ்வளவு

உள்ளூர் வரியையும் சேர்த்து சென்னையில் பெட்ரோல் விலை லிட்டருக்கு 3 ரூபாய் 37 காசு அதிகரித்தது. இதனால் 66 ரூபாய் 8 காசாக இருந்த பெட்ரோல் விலை 69 ரூபாய் 45 காசாக உயர்ந்தது. இதேபோல் சென்னையில் டீசல் விலை லிட்டருக்கு 2 ரூபாய் 98 காசு உயர்ந்தது. இதனால் 52 ரூபாய் 76 காசாக இருந்த ஒரு லிட்டர் டீசலின் விலை 55 ரூபாய் 74 காசாக அதிகரித்தது.

டெல்லி விலை உயர்வு

பெட்ரோல் விலை 63 ரூபாய் 16 பைசாவிலிருந்து 66 ரூபாய் 29 பைசாவாக ஆக உயர்ந்துள்ளது. டீசல் விலை49 ரூபாய்71 பைசாவிலிருந்து 52ரூபாய் 28 பைசாவாக உயர்த்தப்பட்டுள்ளது

கொல்கத்தா.

ஒரு லிட்டர் பெட்ரோல் விலை 70 ரூபாய் 44 பைவிலிருந்து 73 ரூபாய்76 பைசாவாக உயர்த்தப்பட்டுள்ளது. டீசல் விலை 54 ரூபாய் 17 பைசாவிலிருந்து 56 ரூபாய் 85 பைசாவாக உயர்த்தப்பட்டுள்ளது.

மும்பை

பெட்ரோல் விலை லிட்டருக்கு 70 ரூபாய் 84 பைசாவிலிருந்து அதிகரித்து ரூ.74 ரூபாய் 23 பைசாவாக அதிகரித்துள்ளது.

டீசல் விலை லிட்டருக்கு 56 ரூபாய் 87 பைசாவிலிருந்து அதிகரித்து 59 ரூபாய் 86 பைசாவாக ஆக உயர்த்தப்பட்டுள்ளது.

English summary

State-run fuel retailers on Friday raised petrol price by Rs 3.13 a litre and diesel by Rs 2.71, including state levies.