ராமதாஸ் 'ஹேப்பி' அண்ணாச்சி.. பழனிக்குப் போய் குரு மொட்டை போட்டாச்சி!

சென்னை: பாமக நிறுவனர் டாக்டர் ராமதாஸுக்காக மொட்டை போடுவதாக நேர்த்திக் கடன் வேண்டியிருந்த வன்னியர் சங்கத் தலைவர் ஜெ. குரு அதன்படி பழனிக்குப் போய் மொட்டை போட்டு நேர்த்திக் கடனை செலுத்தியுள்ளார்.

லோக்சபா தேர்தல் சமயத்தில் திடீரென டாக்டர் ராமதாஸுக்கு உடல் நலம் குன்றியது. மருத்துவமனையிலும் அனுமதிக்கப்பட்டார். பின்னர் அவர் வீடு திரும்பினார்.

இதையடுத்து டாக்டர் ராமதாஸ் நல்லசுகம் பெற்று வீடு திரும்பினால் பழனிக்கு வந்து முருகனை வணங்கி மொட்டை போடுவதாக நேர்த்திக்கடன் வேண்டியிருந்தார் குரு. இந்த நேர்த்திக் கடனை அவர் தற்போது செலுத்தியுள்ளார்.

பழனிக்குப் போய் அங்கு முருகனை வழிபட்டு முடி காணிக்கை செலுத்தி விட்டு வந்துள்ளார். இன்று சட்டசபைக் கூட்டத்துக்கு அவர் மொட்டைத் தலையுடன் புன்னகை தவழ வந்திருந்தார்.

குரு, ஜெயங்கொண்டம் சட்டசபைத் தொகுதியிலிருந்து பாமக சார்பில் தேர்ந்தெடுக்கப்பட்டவர் என்பது குறிப்பிடத்தக்கது.

English summary

PMK MLA and Vanniar Sangam president Guru tonsured his hair for Dr Ramadoss.