விஜயகாந்த்தை "கிங்"காக ஏற்ற பாஜகவுடன் கூட்டணி இல்லை என திட்டவட்டமாக அறிவிக்க தயங்கும் பாமக
சென்னை: தேமுதிக தலைவர் விஜயகாந்த்தை தேசிய ஜனநாயகக் கூட்டணியின் முதல்வர் வேட்பாளராக ஏற்றுக் கொண்ட பாரதிய ஜனதாவுடன் கூட்டணியே கிடையாது என திட்டவட்டமாக அறிவிக்காமல் பாமக ஊசலாட்டத்தில் இருக்கிறது.
சட்டசபை தேர்தலில் பாமக தலைமையில்தான் கூட்டணி; அன்புமணிதான் முதல்வர் வேட்பாளர்- இதை ஏற்கும் கட்சிகளுடனேயே கூட்டணி என ஓராண்டுகாலமாக கூறி வருகிறது பாமக. ஆனால் பாமக தலைமையில் எந்த ஒரு அரசியல் கட்சியும் இதுவரை போய்ச் சேரவில்லை.
அதே நேரத்தில் பாமகவை தங்களது கூட்டணிக்கு கொண்டுவர பாஜக பகீரத பிரயத்தனம் மேற்கொண்டு வருகிறது. இந்த நிலையில் காஞ்சிபுரம் மாநாட்டில் தாம் கிங்காக இருக்கவே விரும்புவதாக தேமுதிக தலைவர் விஜயகாந்த் கூறினார். இதனைத் தொடர்ந்து பாஜகவும், விஜயகாந்த்தை முதல்வர் வேட்பாளராக அறிவிக்க தயார் என பகிரங்கமாக அறிவித்தது.
ஆக தேசிய ஜனநாயகக் கூட்டணியில் தேமுதிக இணைந்தால் விஜயகாந்த் முதல்வர் வேட்பாளர் என்பது உறுதியாகி இருக்கிறது. இதற்குப் பின்னராவது, இனி பாஜகவுடன் கூட்டணியே இல்லை என பாமக அறிவித்திருக்க வேண்டும்; ஆனால் அப்படி அறிவிக்க பாமக தயங்கி வருகிறது.
இது குறித்து புதிய தலைமுறை தொலைக்காட்சியின் நேர்பட பேசுவின் நேற்றைய விவாதத்தில் பாமக வழக்கறிஞர் பாலுவிடம் கேள்வி எழுப்பப்பட்டது. அவரும் திட்டவட்டமாக எதனையும் சொல்லாமல், எங்கள் தலைமையில்தான் கூட்டணி; அன்புமணிதான் முதல்வர் வேட்பாளர் என்பதில் உறுதியாக இருக்கிறோம்; ஆகையால் கூட்டணி தொடர்பான விவாதங்களுக்கு எங்களை அழைக்காமல் இருந்தால் நல்லது என நீட்டி முழக்கினாரே தவிர, ஒரே போடாக "விஜயகாந்த்தை முதல்வர் வேட்பாளர்னு அறிவித்திருச்சு பாஜக.. ஆக பாஜகவுடன் கூட்டணி இல்லை" என நறுக்கு தெறித்தாற்போல சொல்லவில்லை.
பாமக என்னதான் வெளிப்படையாக, எங்கள் தலைமையில்தான் கூட்டணி; அன்புமணிதான் முதல்வர் வேட்பாளர் என கூறினாலும் பாஜக கூட்டணியில் நீடிக்கவே அது விரும்புகிறது என்பதை வெளிப்படுத்துவதாக அதன் 'நழுவல்' நிலைப்பாடு இருக்கிறது.
Click it and Unblock the Notifications
Sign in with Google