ஜெ. பிறந்த மகம் நட்சத்திரம்... 122 கோவில்களில் ஹேமங்கள்... அர்ச்சனைகள்
சென்னை: முதல்வர் ஜெயலலிதா பிறந்த மாசி மகம் நட்சத்திரத்தை முன்னிட்டு தமிழகம் முழுவதும் பல்வேறு ஆலயங்களில் சகஸ்ரநாம அர்ச்சனை, சுதர்சன ஹோமம், சண்டி ஹோமம், நவசக்தி ஹோமம், ருத்திர திரிசதி பூஜை, ஆயுஷ்ய ஹோமம், நவகலச பூஜை, ருத்திரயாகம் ஆகிய சிறப்பு பூஜைகள் மற்றும் ஹோமங்களை இன்று இந்து சமய அறநிலையத்துறை ஏற்பாடு செய்துள்ளது.
இது தொடர்பாக தமிழக இந்து சமய அறநிலையத்துறை வெளியிட்டுள்ள செய்திக்குறிப்பு:
குரு பகவான் சிம்ம ராசியிலும், கதிரவன் கும்ப ராசியிலும் பிரவேசிக்கும் போது வரும் பவுர்ணமி தினத்தன்று மக நட்சத்திரத்திலும், ரிஷப லக்னத்திலும் கூடும் புண்ணிய நாளான 22-ந் தேதி (இன்று) மகாமகம் ஆகும். இந்நாளில் கும்பகோணத்தில் மகாமக தீர்த்தவாரி விழா சிறப்பாக நடைபெறவுள்ளது. இந்நாளில் தமிழ்நாட்டிலுள்ள பல்வேறு திருக்கோவில்களிலும் மாசிமக தீர்த்தவாரி சிறப்பாக நடைபெறவுள்ளது.
இந்த புண்ணியத் திருநாளில் முதல்-அமைச்சரின் பிறந்த நட்சத்திரம் என்பதும் மற்றுமொரு சிறப்பாகும். இதன் சிறப்பு கருதி தமிழ்நாடு இந்து சமய அறநிலையத்துறையின் சார்பில் 122 திருக்கோவில்களில் சிறப்பு பூஜைகள் நடத்த ஏற்பாடுகள் செய்யப்பட்டுள்ளன.
22-ந் தேதியான இன்று (திங்கட்கிழமை) பழநி தண்டாயுதபாணி திருக்கோவிலில் சண்முகா அர்ச்சனை, மதுரை மீனாட்சி சுந்தரேசுவரர் திருக்கோவிலில் ஒன்பது வகை மலர்களால் மீனாட்சி அம்மனுக்கு நவசக்தி அர்ச்சனையும், சுந்தரேசுவரருக்கு ஐந்து வகை மலர்களால் பஞ்சமுக அர்ச்சனையும், மாங்காடு காமாட்சி அம்மன் திருக்கோவிலில் நவகலச பூஜை, திருவண்ணாமலை அருணாச்சலேசுவரர் திருக்கோவிலில் ருத்ர பாராயணமும், சிறப்பு அபிஷேகம் மற்றும் அர்ச்சனை, சோளிங்கர் லட்சுமி நரசிம்மர் திருக்கோவிலில் சுதர்சன ஹோமமும் என தமிழ்நாட்டிலுள்ள 122 திருக்கோவில்களில் அதிகாலை முதல் சிறப்பு பூஜைகள் நடைபெறவுள்ளன.
மேலும் சகஸ்ரநாம அர்ச்சனை, சுதர்சன ஹோமம், சண்டி ஹோமம், நவசக்தி ஹோமம், ருத்திர திரிசதி பூஜை, ஏகதின லட்சார்ச்சனை, மாலா மந்திர மூல மந்திர யாகம், மாதுளை முத்துக்களால் அபிஷேகம், ஆயுஷ்ய ஹோமம், நவகலச பூஜை, ருத்திரயாகம் ஆகிய சிறப்பு பூஜைகள் மற்றும் ஹோமங்கள் தமிழ்நாட்டிலுள்ள பல்வேறு திருக்கோவில்களில் நடைபெறுகின்றன. பொது மக்கள் அனைவரும் சிறப்பு வழிபாடுகளில் பங்கேற்று இறைவன் திருவருளால் எல்லா நலமும் பெற இதன் மூலம் கேட்டுக்கொள்ளப்படுகிறது என்று அந்த அறிக்கையில் தெரிவித்துள்ளது.
Click it and Unblock the Notifications
Sign in with Google