ஞாபகம் வருதே.. ஞாபகம் வருதே.. திமுக ஆதரவு சேனலில் ஆரம்பித்தது அதிமுக அட்டாக்
சென்னை: தமிழக சட்டசபை தேர்தல் வாக்குப்பதிவு நெருங்கும் நிலையில், ஞாபகம் வருதே.. ஞாபகம் வருதே.. என்று தொடங்கும், டிரேட் மார்க் அரசு எதிர்ப்பு விளம்பரத்தை கையில் எடுத்துள்ளது சன் டிவி.
கடந்த 2011 சட்டசபை தேர்தலாகட்டும், 2006 சட்டசபை தேர்தலாகட்டும், தேர்தல் விளம்பரங்களின் ஹீரோ என்றால், அது ஆட்டோகிராப் திரைப்படத்தில் இடம்பெற்றுள்ள ஞாபகம் வருதே.. ஞாபகம் வருதே.. என தொடங்கும் பாடல்தான்.
2006 சட்டசபை தேர்தலின்போது, அப்போதைய ஆட்சியாளர் ஜெயலலிதாவுக்கு எதிராக இந்த பாடலின் பின்புலத்தில் அந்த 5 ஆண்டு காலத்தில் நடந்த கொடுமைகள் காட்சிகளாக சன்டிவியில் காட்டப்பட்டன. அதேபோல, 2011 சட்டசபை தேர்தலிலும் ஜெயா டிவி இதேபோல திமுக ஆட்சிக்கு எதிராக விளம்பரம் ஒளிபரப்பியது.
ஒருகட்டத்தில் இரு தரப்புமே, இதே பாடலை வைத்து, எதிர் தரப்பு ஆட்சிகளில் நடந்த அவலங்களை விளம்பரமாக காட்டினர். பொதுவாக அப்போது யார் ஆட்சியில் இருக்கிறார்களோ அவர்களுக்கு எதிரான விளம்பரங்களுக்கு வரவேற்பு கிடைத்துவிடும். எதிர்க்கட்சியாக இருப்போர் வென்றுவிடுவார்கள்.
இம்முறையும், ஞாபகம் வருதே விளம்பரங்களை சன்டிவி கையில் எடுத்துள்ளது. சன் நியூஸ் தொலைக்காட்சியில், டாஸ்மாக் எதிர்ப்பு பாடகர் கோவன் கைது, ஜல்லிக்கட்டு விவகாரம், விவசாயிகள் கஷ்டம், மின்வெட்டு, பழுதான பஸ்கள் என வரிசையாக காட்சிகள் காண்பிக்கப்பட்டு பின்னணியில் இந்த பாடல் ஒலிக்கிறது.
கைதுக்கு காரணமாக இருந்த, கோவனின் டாஸ்மாக் எதிர்ப்பு பாடல்களை அவ்வப்போது சன் நியூஸ் ஒளிபரப்பி வருகிறது. மது விலக்கை படிப்படியாக அமல்படுத்துவேன் என்று ஜெயலலிதா அறிவித்ததை கேலி செய்து, போங்கு.. என தொடங்கும் பாடலை கோவன் பாடியிருந்தார். அப்பாடல்களையும் சன் நியூஸ் அவ்வப்போது ஒளிபரப்பி வருகிறது. மக்கள் மத்தியில் ஆட்சிக்கு எதிரான அலையை ஏற்படுத்தும் வகையிலான செய்திகள் தொடர்ச்சியாக ஒளிபரப்பப்பட்டு வருகின்றன.
ஜெயலலிதா தரப்பில் இருந்து என்ன மாதிரி எதிர்விளைவுகள் காட்டப்படும் என்பதை ரத்தத்தின் ரத்தங்கள் எதிர்பார்த்து காத்திருக்கிறார்கள். நடுநிலை வாக்காளர்கள், இரு தரப்பும் போட்டிபோட்டு தவறுகளை கூறிக்கொள்வதை ரசிக்க காத்திருக்கிறார்கள்.
Click it and Unblock the Notifications
Sign in with Google