கஸானா நகைக்கடை நில விவகாரம்... ஈவிகேஎஸ் சகோதரர் வீட்டில் ஐடி ரெய்டு

சென்னை: தனியார் நகைக்கடைக்கு நிலம் விற்றது தொடர்பாக தமிழ்நாடு காங்கிரஸ் கமிட்டித் தலைவர் ஈவிகேஎஸ் இளங்கோவனின் சகோதரர் மதிவாணன் வீட்டில் வருமான வரித்துறையினர் சோதனை நடத்தியதாக தகவல்கள் வெளியாகியுள்ளது.

தனியார் நகைக்கடையான கஸானா குழுமத்திற்கு சொந்தமான நகைக்கடைகள் மற்றும் நிறுவனங்களில் நேற்று வருமான வரித்துறையினர் சோதனை நடத்தியதாகக் கூறப்படுகிறது. கஸானா குழும நிறுவனங்கள் கடந்த இரண்டு வருடமாக வருமான வரி கட்டவில்லை என்ற புகாரின் அடிப்படையில் இந்த அதிரடி சோதனை நடத்தப்பட்டதாகத் தெரிகிறது.

அப்போது கிடைத்த ஒரு ஆவணத்தின் படி, அந்த குழுமத்திற்கு தமிழ்நாடு காங்கிரஸ் கமிட்டித் தலைவர் ஈவிகேஎஸ் இளங்கோவனின் சகோதரர் மதிவாணன் நிலத்தை விற்றது தெரியவந்தது.

அதனைத் தொடர்ந்து நேற்றிரவு அண்ணாநகரில் உள்ள மதிவாணன் வீட்டில் வருமான வரித்துறையினர் சோதனை நடத்தியதாக தகவல்கள் தெரிவிக்கின்றன.

இந்த சோதனையின் போது ஏதேனும் ஆவணங்கள் கைப்பற்றப்பட்டதா என்பது குறித்து தகவல்கள் இல்லை.

English summary

Sources says that, the income tax department has conduct a raid in Tamilnadu congress committee president EVKS's brother home in Chennai yesterday.