இ.ஜ.க. பாரிவேந்தருக்கு நடிகர் ரஜினிகாந்த் 'தொலைபேசி'யில் வாழ்த்து

சென்னை: இந்திய ஜனநாயக கட்சியின் நிறுவனர் பாரிவேந்தருக்கு நடிகர் ரஜினிகாந்த் தொலைபேசி மூலம் வாழ்த்து தெரிவித்துள்ளார்.

லோக்சபா தேர்தல் களத்தில் நடிகர் ரஜினிகாந்தை பாஜக பிரதமர் வேட்பாளர் மோடி சந்தித்து பேசி பரபரப்பை ஏற்படுத்தினார். இதைத் தொடர்ந்து மோடிக்கு முன்னதாகே ரஜினியை சந்தித்தேன் என்று வைகோ புகைப்படம் வெளியிட்டார்.

பின்னர் மோடியை நடிகர் விஜய் சந்தித்து பேசினார். இந்நிலையில் இந்திய ஜனநாயகக் கட்சியின் நிறுவனரும் பெரம்பலூர் தொகுதி வேட்பாளருமான பாரிவேந்தர் என்ற பச்சமுத்துவை நடிகர் ரஜினிகாந்த் தொலைபேசியில் தொடர்பு கொண்டு வாழ்த்து தெரிவித்ததாக பாரிவேந்தருக்கு சொந்தமான புதிய தலைமுறை தொலைக்காட்சி செய்தி வெளியிட்டுள்ளது.

புதிய தலைமுறை தொலைக்காட்சி செய்தியில் தெரிவிக்கப்பட்டுள்ளதாவது:

இந்திய ஜனநாயகக் கட்சியின் பாரிவேந்தரை தொலைபேசியில் தொடர்பு கொண்டு பேசிய ரஜினிகாந்த், அரசியல் கட்சி தொடங்கியதற்கும், மக்களவைத் தேர்தலில் போட்டியிடுவதற்கும் மகிழ்ச்சி தெரிவித்தார்.

பாரிவேந்தர் போன்ற கல்வியாளர் அரசியலுக்கு வருவது ஆரோக்கியமானது என்றுகூறி ரஜினிகாந்த் வாழ்த்து தெரிவித்தார். ரஜினிகாந்த்தின் வாழ்த்தினை ஏற்றுக்கொண்ட பாரிவேந்தர், அவருக்கு நன்றி தெரிவித்தார்.

இவ்வாறு அந்த செய்தியில் தெரிவிக்கப்பட்டுள்ளது.

English summary

Actor Rajinikanth greets IJP leader Pariventhar ahead of lok sabha elections.