காலா ஷூட்டிங்கும் முடியப் போகுது.. அடுத்த மாசமாச்சும் அரசியலுக்கு வந்துருவாரா ரஜினி?
காலா படப்பிடிப்பு முடியும் தருவாயில் இருப்பதால் அடுத்த மாதத்தில் ரசிகர்களை சந்தித்து அரசியல் பிரவேசம் குறித்து ரஜினிகாந்த் அறிவிக்க உள்ளதாக தகவல்கள் வெளியாகியுள்ளன.
சென்னை : காலா படப்பிடிப்பு இறுதிக் கட்டத்தில் இருப்பதால் படப்பிடிப்பு முடிந்தவுடன் அடுத்த மாதத்தில் ரசிகர்களை சந்தித்து அரசியல் பிரவேசம் குறித்து நடிகர் ரஜினிகாந்த் அறிவிக்க உள்ளதாக பரபரப்பான தகவல்கள் வெளியாகியுள்ளன.
கபாலி பட இயக்குனர் பா. ரஞ்சித் இயக்கத்தில் மும்பை தாதாவாக நடிகர் ரஜினிகாந்த் நடிக்கும் காலா திரைப்படத்தின் படப்பிடிப்பு முடிய இருப்பதாக தெரிகிறது. மும்பையின் தாராவி பகுதியில் தொடங்கி படப்பிடிப்பு நடைபெற்று வந்தது. படப்பிடிப்பு தொடங்கியது முதல் மின்னல் வேகத்தில் விறுவிறுப்பாக நடைபெற்று வருகிறது.
சுமார் 80 சதவீத படப்பிடிப்பு முடிந்து விட்டதாக தெரிகிறது. எஞ்சிய பகுதிகளை படமாக்க பூந்தமல்லி பகுதியில் தாராவி போன்ற செட் அமைக்கப்பட்டு அங்கு படப்பிடிப்பு நடைபெற்று வருகிறது. நடிகர் ரஜினிகாந்த் நடிக்கும் காட்சிகள் படமாக்கப்பட்ட பிறகு எஞ்சிய காட்சிப் படப்பிடிப்பிற்காக படக்குழு மீண்டும் மும்பை செல்ல உள்ளது.
அக்டோபர் மாதத்தில் சந்திப்பு
இந்நிலையில் காலா படப்பிடிப்பால் நடிகர் ரஜினிகாந்த் ரசிகர்களை சந்திக்கும் படலம் தடை பட்டு போயுள்ளது. விடுபட்ட 15 மாவட்டங்களைச் சேர்ந்த ரசிகர்கள் எப்போது ரஜினிகாந்த்துடன் புகைப்படம் எடுத்துக் கொள்ளப் போகிறோம், நேரில் பார்க்கப் போகிறோம் என்று காத்திருக்கின்றனர். காலா படப்பிடிப்பு முடிந்தவுடன் அக்டோபர் மாதத்தில் 6 நாட்கள் தொடர்ச்சியாக ரஜினிகாந்த் ரசிகர்களை சந்திப்பார் என்று தகவல் வெளியாகியுள்ளது.
அடையாள அட்டை தயார்
சென்னை கோடம்பாக்கத்தில் உள்ள ராகவேந்திரா கல்யாண மண்டபத்திலே இந்த சந்திப்பு நடைபெற உள்ளதாக தெரிகிறது. இந்த சந்திப்பில் பங்கேற்க உள்ள ரசிகர்களுக்கான அடையாள அட்டைகள் தாயராகி வருகின்றன.
அரசியல் அறிவிப்பு
ரசிகர்களுடனான இந்த சந்திப்பின் போது ரஜினிகாந்த் தன்னுடைய அரசியல் பிரேவசம் குறித்த தெளிவான நிலைப்பாட்டை அறிவிப்பார் என்று தெரிகிறது. கடந்த முறை ரசிகர்களுடனான சந்திப்பின் போது போருக்கு தயாராகுங்கள் நேரம் வரும் போது அரசியல் பற்றி அறிவிப்பேன் என்று கூறியிருந்தார்.
ஆதரவு
அரசியலுக்கு வந்தால் பணம் சம்பாதிக்க நினைப்பவர்களை பக்கத்தில் வைத்துக் கொள்ள மாட்டேன் என்றார். ரஜினியின் அரசியல் முடிவு குறித்து அவரது குடும்பத்தினரும் ஆதரவான கருத்தையே தெரிவித்து வருகின்றனர்.
யார் முதலில்?
நான் என்றோ அரசியலுக்கு வந்து விட்டேன் என்று கூறி அரசியலில் தீவிரமாக ஈடுபட்டு வருகிறார் நடிகர் கமல்ஹாசன், விரைவில் அது குறித்த அதிகாரப்பூர்வ அறிவிப்பை வெளியிடுவார் என்று தெரிகிறது. இந்நிலையில் ரஜினியும் தனது அரசியல் பிரவேசம் குறித்த அதிகாரப்பூர் அறிவிப்பை வெளியிட உள்ளதாக கூறப்படுகிறது.
Click it and Unblock the Notifications
Sign in with Google