வளைத்து போட பாஜக பகீரத முயற்சி... மோடியை சந்திக்க டெல்லி செல்கிறார் ரஜினிகாந்த்!
அரசியலில் நுழைய திட்டமிட்டுள்ள நடிகர் ரஜினிகாந்த் விரைவில் பிரதமர் மோடியை சந்திக்க உள்ளார்.
சென்னை: நடிகர் ரஜினிகாந்த் மீது தமிழக பாஜக தலைவர்கள் பாய்ந்து பிராண்டி கொண்டிருந்தாலும் டெல்லி மேலிடமோ அவரை வளைத்துப் போடுவதில் படுதீவிரமாக இருக்கிறது. பிரதமர் மோடியை விரைவில் ரஜினிகாந்த் நேரில் சந்தித்து பேசுவார் என்கின்றன டெல்லி தகவல்கள்.
இதோ..அதோ என ஒருவழியாக அரசியலில் நுழையப் போவதை கால் நூற்றாண்டுக்குப் பின்னர் அறிவித்து வருகிறார் ரஜினிகாந்த். அவர் நிச்சயம் அரசியலுக்கு வருவார்; முதலமைச்சர் கனவுடன் இருக்கிறார் என நண்பர் ராஜ்பகதூரும் தெரிவித்திருக்கிறார்.
தனிக்கட்சி
ரஜினிகாந்த் வந்தால்தான் தமிழகத்தைக் காப்பாற்ற முடியும்; தமிழகத்தில் நிலவும் ஊழலை ஒழிக்க முடியும் என்று கர்நாடகாவில் இருந்து அவரது நண்பர் ராஜ்பகதூர் பேட்டியளித்திருக்கிறார். ரஜினி தனிக்கட்சி தொடங்குவார் எனவும் கூறப்பட்டு வருகிறது.
ரஜினிக்கு அழைப்பு
இந்நிலையில் ரஜினிகாந்துக்காக பாஜகவின் கதவுகள் திறந்தே இருக்கின்றன என பாஜக தலைவர் அமித்ஷா வெளிப்படையாக அழைப்பு விடுத்திருக்கிறார். ஆனால் தமிழக பாஜக தலைவர்களோ ரஜினிகாந்தை கடுமையாக விமர்சித்து வருகின்றனர்.
ரஜினியுடன் பேச்சு
இதனிடையே டெல்லி மேலிடத்தில் இருந்து பாஜக மூத்த தலைவர்கள் சிலர் ரஜினிகாந்துடன் பேச்சுவார்த்தை நடத்தியதாக கூறப்படுகிறது. அப்போது பிரதமர் மோடியை நேரில் சந்திக்க வருமாறும் ரஜினிகாந்துக்கு அழைப்பு விடுக்கப்பட்டதாம்.
டெல்லியில் மோடியுடன் சந்திப்பு
இதனை ஏற்று விரைவில் ரஜினிகாந்த் டெல்லி செல்ல இருப்பதாக கூறப்படுகிறது. மோடியுடனான சந்திப்பில் தமது அரசியல் பிரவேசம் குறித்து ரஜினிகாந்த் விளக்கம் அளிப்பார் என தெரிகிறது.
Click it and Unblock the Notifications
Sign in with Google