'-12'... இது அதிமுக அரசுக்கு ராமதாஸ் போட்ட மார்க்!

சென்னை: தமிழகத்தில் கடந்த மூன்று ஆண்டுகளுக்கும் மேலாக ஆட்சியில் இருக்கும் அதிமுக அரசின் செயல்பாட்டுக்கு மைனஸ் 12 மார்க் மட்டுமே போட முடியும் என்று பாமக நிறுவனர் டாக்டர் ராமதாஸ் கூறியுள்ளார்.

இது தொடர்பாக தமிழ் வார இதழ் ஒன்றுக்கு அவர் அளித்துள்ள பேட்டியில்,

"தமிழகத்தில் நடைபெறும் ஊழல்கள் தொடர்பாக ஆளுநரிடம் மொத்தம் 209 பக்க ஆதாரங்களைக் கொடுத்துள்ளோம். விசாரணை என வரும்போது, அதை நாங்கள் விசாரணை அமைப்பிடம் தாக்கல் செய்வோம்.

தாதுமணல் கொள்ளையில் நடந்த ஊழல், கிரானைட் கொள்ளையில் நடைபெற்றுள்ள ஊழல், ஆற்று மணல் அள்ளுவதில் நடைபெற்றுள்ள ஊழல் என வரிசையாகச் சொல்லலாம்.

நிலக்கரி ஊழல், 2ஜி ஸ்பெக்ட்ரம் ஊழல் தமிழகத்தில் நடந்திருக்கிறது. இந்தத் தொகை சரியாக தமிழகத்தின் அரசு கஜானாவுக்கு வந்திருந்தால், பட்டி தொட்டியெங்கும் இன்பம் கொட்டிக் கிடந்திருக்கும்.

விவசாயத் துறையில் தமிழகம் அடைந்துள்ள வளர்ச்சிதான், தமிழக அரசுக்கு நான் கொடுக்கும் மதிப்பெண்கள். அந்த வகையில், விவசாயத்துறையின் வளர்ச்சி மைனஸ் 12. அதையே தமிழக அரசுக்கும் நான் கொடுக்கிறேன்" என்றார் அவர்.

English summary

The PMK founder Ramadoss has given minus 12 marks for the ADMK led Tamilnadu government .