"டிமான்டி காலனி" நாயகன் அருள் நிதி திருமண வரவேற்பு.. "கேப்டன்" வரவில்லை.. ராமதாஸ் ஆஜர்!

சென்னை: திமுக தலைவர் கருணாநிதியின் பேரனும், நடிகருமான அருள் நிதியின் திருமண வரவேற்பு நேற்று மாலை சென்னையில் நடந்தேறியது. இதில் ஆளுநர் ரோசய்யா உள்ளிட்ட பல தலைவர்கள் கலந்து கொண்டனர்.

நடிகர் ரஜினி காந்த்தும் வரவேற்பு நிகழ்ச்சியில் கலந்து கொண்டு மணமக்களை வாழ்த்தினார்.

திமுக தலைவர் கருணாநிதியின் இளைய மகன் மு.க.தமிழரசுவின் மகன் அருள் நிதி. இவருக்கும், கீர்த்தனாவுக்கும், திருமண வரவேற்பு நேற்று மாலை அண்ணா அறிவாலயம், கலைஞர் அரங்கில் நடைபெற்றது.

இந்த விழாவில் ஆளுநர் ரோசய்யா கலந்து கொண்டார். மணமக்களுக்கு வாழ்த்து கூறிய அவர் கருணாநிதியிடமும் நலம் விசாரித்தார். அதேபோல நடிகர் ரஜினிகாந்த், மு.க.அழகிரி, மு.க.ஸ்டாலின், கனிமொழி உள்ளிட்ட கருணாநிதி குடும்பத்தாரும் திருமண வரவேற்பில் கலந்து கொண்டனர்.

இதேபோல பாமக நிறுவனர் டாக்டர் ராமதாஸும் திருமண வரவேற்பில் கலந்து கொண்டார். தமாகா தலைவர் ஜி.கே.வாசன், கட்சியின் மூத்த துணைத் தலைவர் ஞானதேசிகன், காங்கிரஸ் எம்.எல்.ஏ. விஜயதாரணி, நடிகர் சத்யராஜ், மத்திய அமைச்சர் வெங்கையா நாயுடு உள்பட பலரும் கலந்து கொண்டனர்.

இன்று வருவாரா விஜயகாந்த்?

திருமண வரவேற்பில் முக்கிய ஆப்சென்ட் தேமுதிக தலைவர் விஜயகாந்த். அவருக்குப் பதில் அவரது மச்சான் சுதீஷ் வந்திருந்தார். ஒருவேளை திருமணத்திற்கு அவர் வரலாம் என்று தெரிகிறது.

English summary

Governor Rosaiah, PMK Founder Dr Ramadoss and various political leaders and actors, VIPs attended DMK chief Karunanidhi's grandson Arulnidhi's wedding reception.