குறைந்த ரத்த அழுத்தம்... தீவிர சிகிச்சைப் பிரிவில் ராமகோபாலன் - உடல் நிலையில் முன்னேற்றம்

கோவை: குறைந்த ரத்த அழுத்தம் காரணமாக மருத்துவமனையில் அனுமதிக்கப் பட்டு சிகிச்சைப் பெற்று வரும் இந்து முன்னணித் தலைவர் ராமகோபாலனின் உடல் நிலையில் நல்ல முன்னேற்றம் ஏற்பட்டுள்ளதாக மருத்துவர்கள் தெரிவித்துள்ளனர்.

நேற்று முன்தினம் இந்து முன்னணி சார்பில் கோவையில் ஆலய தரிசன கட்டணத்தை ரத்து செய்யக்கோரி ஆர்ப்பாட்டம் நடந்தது. இதில் இந்து முன்னணியின் நிறுவன அமைப்பாளர் ராமகோபாலன் கலந்துகொண்டு பேசினார். பின்னர் கணபதியில் உள்ள இந்து முன்னணி செயற்குழு உறுப்பினர் கிருஷ்ணக்குமார் என்பவரின் வீட்டில் தங்கியிருந்தார்.

இந்நிலையில் நேற்று மதியம் தீடீரென ராமகோபாலனின் உடல் நிலை பாதிக்கப்பட்டது. குறைந்த ரத்த அழுத்தம் காரணமாக அவதிப்பட்ட அவரை நிர்வாகிகள் ஆம்புலன்ஸ் மூலம் கோவை ராமகிருஷ்ணா ஆஸ்பத்திரியில் அழைத்துச் சென்றனர்.

அங்கு ராமகோபாலனின் உடல்நிலையைச் சோதித்த மருத்துவர்கள், அவரை தீவிர சிகிச்சைப் பிரிவில் சேர்த்து சிகிச்சை அளித்து வந்தனர். இந்நிலையில், இன்று அவரது உடல்நிலையில் நல்ல முன்னேற்றம் ஏற்பட்டுள்ளதாக டாக்டர்கள் குழுவினர் தெரிவித்துள்ளனர்.

மேலும், இன்று மாலை அல்லது நாளை ராமகோபாலன், மருத்துவமனையில் இருந்து வீடு திரும்புவார் எனத் தகவல்கள் தெரிவிக்கின்றன.

அசம்பாவிதங்களைத் தடுக்க முன்னெச்சரிக்கையாக ராமகோபாலன் சிகிச்சை பெற்று வரும் மருத்துவமனைக்கு பலத்த போலீஸ் பாதுகாப்பு போடப் பட்டுள்ளது.

English summary

The doctors have said that the Hindu munani chief Ramagopalan's health is improving.