மக்கள் பணம் எப்படியெல்லாம் வீணாகுது.. ஆர்.கே.நகரில் 3 ஆண்டுகளில் 3வது முறையாக தேர்தல்!

கடந்த 3 ஆண்டுகளில் 3-வது முறையாக தேர்தலை எதிர்கொள்கிறது தமிழகமே பெரும் எதிர்பார்க்கும் சென்னை ஆர்.கே.நகர் தொகுதி.

By Mathi

Updated: Thursday, March 9, 2017, 13:45 [IST]

Subscribe to Oneindia Tamil

சென்னை: தமிழகமே பெரும் எதிர்பார்ப்புடன் இருக்கும் ஆர்.கே.நகர் தொகுதிக்கான இடைத்தேர்தல் ஏப்ரல் 12-ந் தேதி நடைபெறும் என தேர்தல் ஆணையம் அறிவித்துள்ளது. கடந்த 3 ஆண்டுகளில் 3-வது முறையாக தேர்தலை எதிர்கொள்கிறது ஆர்.கே.நகர் தொகுதி.

தமிழகத்தின் சிறிய தொகுதிகளில் ஒன்று சென்னை ஆர்.கே.நகர் தொகுதி. 1977-ம் ஆண்டு இத்தொகுதி உருவாக்கப்பட்டது. முதல் தேர்தலில் ஆர்.கே.நகர் தொகுதியை அதிமுகவின் நடிகர் ஐசரிவேலன் வென்றார்.

அதன்பின்னர் காங்கிரஸ் 2 முறை தொடர்ச்சியாக வென்றது. 1989-ம் ஆண்டு தேர்தலில் திமுகவின் மறைந்த எஸ்.பி. சற்குணமும் வென்றார். 1991-ம் ஆண்டு தேர்தலில் அதிமுகவின் மதுசூதனனும் 1996-ம் ஆண்டு தேர்தலில் மீண்டும் எஸ்.பி. சற்குணமும் வென்றார்.

அதிமுக கோட்டை

ஆனால் 2001-ம் ஆண்டுக்குப் பின்னர் இது அதிமுக கோட்டையாக ஆர்.கே.நகர் தொகுதி உருவெடுத்தது. அதிமுகவில் இருந்த சேகர் பாபு 2 முறை தொடர்ந்து வெற்றி பெற்றார். அவர் அதிமுகவில் இருந்து விலகி திமுகவில் ஐக்கியமானார். இதையடுத்து 2011-ம் ஆண்டு சட்டசபை தேர்தலில் அதிமுகவின் பி. வெற்றிவேல் போட்டியிட்டு வெற்றி பெற்றார்.

இடைத் தேர்தல்

சொத்து குவிப்பு வழக்கில் ஜெயலலிதாவை கர்நாடகா உயர்நீதிமன்றம் விடுதலை செய்தது. இதனால் ஜெயலலிதா மீண்டும் முதல்வரானார். அவர் போட்டியிடுவதற்காக வெற்றிவேல் எம்.எல்.ஏ. பதவியை ராஜினாமா செய்தார். இதையடுத்து 2015-ம் ஆண்டு ஆர்.கே.நகர் தொகுதி இடைத்தேர்தலை சந்தித்தது. அத்தேர்தலில் போட்டியிட்டு முதல்வராக இருந்த ஜெயலலிதா வென்றார்.

மீண்டும் ஜெ.

பின்னர் 2016-ம் ஆண்டு நடைபெற்ற சட்டசபை தேர்தலில் மீண்டும் ஆர்.கே.நகர் தொகுதியில் ஜெயலலிதா போட்டியிட்டு வென்றார். ஆனால் கடந்த ஆண்டு டிசம்பர் 5-ந் தேதி ஜெயலலிதா உடல்நலக் குறைவால் காலமானார். இதையடுத்து ஆர்.கே.நகர் தொகுதி காலியாக இருப்பதாக தேர்தல் ஆணையம் அறிவித்தது.

3 ஆண்டுகளில் 3வது தேர்தல்

தற்போது ஏப்ரல் 12-ந் தேதியன்று ஆர்.கே.நகர் தொகுதிக்கு இடைத்தேர்தல் நடைபெறும் என்று தேர்தல் ஆணையம் அறிவித்துள்ளது. கடந்த 3 ஆண்டுகளில் ஆர்.கே.நகர் தொகுதி எதிர்கொள்ளும் 3-வது தேர்தல் இது என்பது குறிப்பிடத்தக்கது.