அரசு கருவூலத்திற்குச் சென்றது தேர்தலில் கைப்பற்றப்பட்ட ரூ 76.89 கோடி

சென்னை: லோக்சபா தேர்தல் கெடுபிடிகளின் போது தமிழகத்தில் கைப்பற்றப்பட்ட ரூ.76.89 கோடி மதிப்பிலான பணம் மற்றும் பொருட்கள் அரசு கருவூலத்தில் ஒப்படைக்கப்படுவதாக தமிழக தலைமை தேர்தல் அதிகாரி பிரவீன்குமார் தெரிவித்துள்ளார்.

16வது லோக்சபா தேர்தலின் 6வது கட்டத் தேர்தல் கடந்த 24ம் தேதியன்று ஒரே கட்டமாக தமிழகத்தில் உள்ள 39 தொகுதிகளுக்கும் நடத்தப்பட்டது. அத்தேர்தலை அமைதியாகவும், நேர்மையாகவும் நடத்த தேர்தல் ஆணையம் பல்வேறு முன்னெச்சரிக்கை நடவடிக்கைகளை மேற்கொண்டது.

அதன்படி, தீவிர வாகனச் சோதனை மூலம் வாக்காளர்களுக்கு பணப்பட்டுவாடா மற்றும் பரிசுப் பொருட்கள் தரப்படுவதை தடுக்கும் முயற்சிகளை மேற்கொண்டது தேர்தல் ஆணையம். அதன்படி, கைப்பற்றப்பட்ட பணம் மற்றும் பொருட்களை அரசு கருவூலத்திற்கு அனுப்பியுள்ளதாக தேர்தல் ஆணையம் தெரிவித்துள்ளது.

இது தொடர்பாக நேற்று தமிழக தலைமை தேர்தல் அதிகாரி பிரவீன்குமார் வெளியிட்டுள்ள செய்திக்குறிப்பில் கூறப்பட்டிருப்பதாவது :-

முன்னெச்சரிக்கை நடவடிக்கைகள்...

தமிழகத்தில் நாடாளுமன்ற தேர்தலில் ஓட்டுக்காக மக்களுக்கு பணம் கொடுக்கும் நடவடிக்கையை தடுப்பதற்காக இந்திய தேர்தல் கமிஷன் பல்வேறு நடவடிக்கைகளை எடுக்க உத்தரவிட்டது.

தீவிர சோதனை...

இதற்காக பறக்கும் படைகள், கண்காணிப்பு குழுக்கள், மண்டல குழுக்கள் அமைக்கப்பட்டு, தீவிர சோதனைகள் நடத்தப்பட்டு வருகின்றன.

ரொக்கமாகவும், பரிசுப் பொருட்களாகவும்...

இந்த சோதனையில் 25 கோடியே 5 லட்சத்து 89 ஆயிரத்து 211 ரூபாய் ரொக்கமாக பிடிபட்டது. அதோடு, 51 கோடியே 83 லட்சத்து 54 ஆயிரத்து 626 ரூபாய் மதிப்புள்ள சேலைகள், நகைகள் மற்றும் பல்வேறு பொருட்களும் கைப்பற்றப்பட்டுள்ளன.

மொத்த மதிப்பு...

கைப்பற்றப்பட்ட பணம் மற்றும் பொருட்களின் மொத்த மதிப்பு, 76 கோடியே 89 லட்சத்து 43 ஆயிரத்து 837 ரூபாயாகும்.

வீடியோ பதிவு...

சோதனை மற்றும் கைப்பற்றும் நடவடிக்கைகள் அனைத்தும் வீடியோவில் பதிவு செய்யப்பட்டுள்ளன.

அரசு கருவூலம்...

பிடிபட்ட பணம் மற்றும் பொருட்கள் அனைத்தும் அரசு கருவூலங்களுக்கு அனுப்பப்பட்டுள்ளன' என இவ்வாறு அதில் தெரிவிக்கப்பட்டுள்ளது.

English summary

A total of Rs. 76.89 crore, suspectedly meant to be used for wooing voters during the Lok Sabha polls in Tamil Nadu, was seized by officials and it has been deposited with the state treasury, Chief Electoral Officer Praveen Kumar said in Chennai.