"இந்தியா" வெள்ளையனுக்கு பிறந்த பிள்ளை... ஃபேஸ்புக்கில் சீமான் போட்ட சர்ச்சை கவிதை

சென்னை: "இந்தியா என்றொரு நாடு எப்போதும் இருந்ததில்லை... ஆம் இந்த இந்தியா வெள்ளையனுக்குப் பிறந்த பிள்ளை" என்று கவிக்கோ அப்துல் ரகுமானின் கவிதையை தம்முடைய ஃபேஸ்புக் பக்கத்தில் 'ஆடியோ- வீடியோவுடன்' நாம் தமிழர் கட்சித் தலைவர் சீமான் பதிவிட்டுள்ளது சர்ச்சையை கிளப்பியுள்ளது.

நாம் தமிழர் கட்சித் தலைவர் சீமானின் அதிகாரப்பூர்வ முக நூல் பக்கம் https://www.facebook.com/senthamizhanseeman. இதில் "தினம் ஒரு செய்தி" என்ற தலைப்பில் நாள்தோறும் பல கவிஞர்களின் கவிதைகளை பதிவிட்டு அதற்கு ஏற்ப வீடியோ காட்சிகளை அமைத்து சீமானின் குரலில் கவிதை வரிகள் இடம்பெற்று வருகின்றன.

இன்று 'தினம் ஒரு செய்தி 81-ல்' கவிக்கோ அப்துல்ரகுமானின் கவிதை ஒன்றை சீமான் பகிர்ந்து வெளியிட்டிருக்கிறார். இந்தியாவை விமர்சிக்கும் இந்த கவிதையை சீமான் பதிவிட்டுள்ளது இப்போது சர்ச்சையாகி உள்ளது.

சீமான் பதிவிட்ட கவிதை:

வெள்ளையனுக்குக் குளிர் அடித்தது
துண்டுதுண்டாய்க் கிடந்த துணிகளை எடுத்து
ஒட்டுபோட்டுச் சட்டை தைத்து
அணிந்து கொண்டான் - அதை
இந்தியா என்றார்கள்!
கோடை வந்தது
புழுக்கம் தாளாமல் அவன் சட்டையைக்
கழற்றி எறிந்தான் - அதை
சுதந்திரம் என்றார்கள்.
சுதந்திரம் வாங்க தெரிந்தது
வைக்கத் தெரிந்ததா?
ஆங்கிலேயன் கொடுத்தது
சுதந்திரம் மட்டுமல்ல
இந்தியாவும்தான்.
இந்த எல்லைகளோடு
இந்தியா என்றொரு நாடு
எப்போதும் இருந்ததில்லை
ஆம்
இந்த இந்தியா
வெள்ளையனுக்குப் பிறந்த பிள்ளை - ஆனால்
நாம் தந்தை உரிமை கொண்டாடினோம்.
ஆங்கிலேயனின் சிலுவைக்குறி
நம்மைக் கூட்டும் குறியாக இருந்தது - ஆனால்
நாம் வாங்கிய சுதந்திரமோ
நம்மைச் சிலுவையில் அறைந்தது
அவன் கூட்டினான்
நாம் கழித்தோம்
அவன் தொகுத்தான்
நாம் வகுத்தோம்
சாதி என்றும் சமயம் என்றும்
விதவிதமான வகுத்தல்
இடையிலோர் ஈவும் இல்லை
இரக்கமும் இல்லை
- கவிக்கோ அப்துல் ரகுமான்

English summary

Naam Thamizhar Party leader Seeman shared the Controversy poem in his FB page.