விஷாலை எதிர்த்து தனுஷ், சிம்புவை களம் இறக்குகிறாரா சரத்குமார்?

சென்னை: நடிகர் சங்க தேர்தலில் சரத்குமார் அணியில் சிம்பு, தனுஷ் போட்டியிட இருப்பதாக தகவல் வெளியாகியுள்ளது.

நடிகர் சங்கத் தேர்தல் தொடர்பாக தொடர்ந்து அனல் பறக்க பிரச்சினை நடந்து வருகிறது. விஷால், கார்த்தி உள்ளிட்டவர்கள் ஒருதரப்பாகவும், சரத்குமார், ராதாரவி உள்ளிட்ட அணி மற்றொரு தரப்பாகவும் உள்ளது.

இந்த இரண்டு அணிகளும் நடிகர் சங்கத் தேர்தல் விவகாரத்தில் மோதி வருகின்றனர். இந்தப் பிரச்சினை நீதிமன்ற வாசலையும் எட்டியுள்ளது.

இளம் நடிகர்கள்...

இளம் நடிகர்கள் தங்கள் பக்கம்தான் என்று விஷால் குரூப் கூறிக் கொள்கிறது. இந்த நிலையில் இதை உடைத்து நொறுக்கும் வகையில் லீடிங்கில் இருக்கும் முன்னணி இளம் நடிகர்களான தனுஷ், சிம்பு ஆகியோரைக் களம் இறக்க சரத்குமார் முடிவு செய்துள்ளதாக தெரிகிறது.

தனுஷ், சிம்பு...

நடிகர் சங்க தேர்தலில் சரத்குமார் அணியில் சிம்பு, தனுஷ் போட்டியிட இருப்பதாக திருச்சி மாவட்ட நாடக நடிகர் சங்க பொதுச்செயலாளர் முகமது மஸ்தான் கூறியுள்ளார்.

வாக்குரிமை...

இது தொடர்பாக செய்தியாளர்கள் சந்திப்பில் அவர் கூறுகையில், "திருச்சி மாவட்ட நாடக நடிகர் சங்கத்தில் 248 உறுப்பினர்கள் உள்ளனர். இவர்களில் 148 பேருக்கு தென்னிந்திய நடிகர் சங்கத் தேர்தலில் வாக்குரிமை உள்ளது.

சிம்பு போட்டி...

திருச்சி நாடக நடிகர் சங்கம் சரத்குமார், ராதாரவி அணியை ஆதரிக்கிறது. சரத்குமார் அணி சார்பில் சிம்பு போட்டியிடப் போகிறார். அது பொருளாளர் பதவியாக இருக்க வாய்ப்புள்ளது.

தனுஷும்...

இதேபோல், ஏற்கனவே எங்கள் அணியில் உள்ள தனுஷ், எஸ்.எஸ்.ஆர். மகன் கண்ணன் போன்றோரும் இத்தேர்தலில் போட்டியிட உள்ளனர்.

விஷால் கூட்டம்...

மேலும், திருச்சியில் விஷால் ஏற்பாடு செய்துள்ள நாடக நடிகர்கள் ஆலோசனைக் கூட்டத்திற்கும் தங்களுக்கும் எந்த தொடர்பு இல்லை என்றும் அவர் அதில் தெரிவித்துள்ளார்.

மாரி...

தனுஷ் நடித்த மாரி படத்தை சரத்குமாரின் மனைவி ராதிகாதான் தயாரித்திருந்தார் என்பது நினைவிருக்கலாம்.

English summary

Trichy district drama artists association president Muhammad Mastan has said that actors Simbu and Dhanush will be contesting in south indian film actors association election.