அதெப்படி மக்கள் நலக் கூட்டணியில் தமாகா சேரலாம்? பீட்டர் அல்போன்ஸ் கொந்தளிப்பு

சென்னை: மக்கள் நலக் கூட்டணி-தேமுதிக கட்சி கூட்டணியுடன், தமிழ் மாநில காங்கிரஸ் கட்சி கூட்டணி அமைந்ததில் இக்கட்சியின் மூத்த தலைவர்கள் பீட்டர் அல்போன்ஸ் மற்றும் எஸ்.ஆர்.பாலசுப்பிரமணியம் ஆகியோருக்கு உடன்பாடு இல்லை என்று தகவல் வெளியாகியுள்ளது. இதை பீட்டர் அல்போன்சும் ஒப்புக்கொண்டுள்ளார்.

வாசன் தலைமையிலான தமிழ் மாநில காங்கிரஸ் கட்சி, அதிமுகவோடு கூட்டணி அமைக்க ஆசை கொண்டிருந்தது. ஆனால், வாசன் கட்சிக்கு 15 இடங்கள் வரை ஒதுக்கி தர ஜெயலலிதா முன்வந்ததாகவும், ஆனால், இரட்டை இலை சின்னத்தில்தான் போட்டியிட வேண்டும் என்று அவர் நிபந்தனை விதித்ததாகவும் தகவல் வெளியானது.

இந்த நிபந்தனைக்கு வாசன் கடுமையாக எதிர்ப்பு தெரிவித்தார். அடுத்தகட்ட நடவடிக்கை பற்றி ஆலோசித்து வந்தார். திமுகவோடு கூட்டணி அமைக்க பீட்டர் அல்போன்ஸ் மற்றும் எஸ்.ஆர்.பாலசுப்பிரமணியம் ஆகியோர் வற்புறுத்தி வந்ததாக தெரிகிறது. ஆனால், திமுக கூட்டணியில் காங்கிரஸ் கட்சி இருப்பதால், வாசனுக்கு அதில் விருப்பமில்லையாம்.

இந்நிலையில், மக்கள் நல கூட்டணியில் இணைய வாசன் விரும்பியுள்ளார். கொள்கை ரீதியாக இந்த கூட்டணி நமக்கு உடன்படும் என்று வாசன் எடுத்து கூறியுள்ளார். இதற்கு மூத்த தலைவர் ஞானதேசிகன் ஆதரவு கொடுத்தபோதிலும், பீட்டர் அல்போன்ஸ் மற்றும் பாலசுப்பிரமணியம் ஆகிய இருவருக்கும் இதில் உடன்பாடு இல்லை என்று தெரிகிறது.

ம.ந.கூவுக்கு சென்றால், வெற்றி பெறுவோமா என்ற சந்தேகத்தை அவர்கள் இருவரும் எழுப்பியுள்ளனர். காங்கிரசுக்கே திரும்பி செல்லலாமா என்று கூட பீட்டர் அல்போன்சும், பாலசுப்பிரமணியமும் யோசித்துக் கொண்டிருப்பதாக தெரிகிறது.

இந்நிலையில்தான் தேனாம்பேட்டையில் வாசனை மக்கள் நல கூட்டணி தலைவர்கள் இன்று சந்தித்தபோது, ஞானதேசிகன் மட்டுமே வாசனுடன் இருந்தார். அக்கட்சியின் மூத்த தலைவர்கள் பீட்டர் அல்போன்ஸ் மற்றும் பாலசுப்பிரமணியம் இருவரும் இல்லை.

மக்கள் நல கூட்டணியில், வாசன் கட்சி 26 தொகுதிகளில் போட்டியிட ஒப்பந்தம் போடப்பட்ட நிலையில், பீட்டர் அல்போன்ஸ் டிவி சேனல் ஒன்றுக்கு அளித்த பேட்டியில், இக்கூட்டணியில் தனக்கு உடன்பாடு இல்லை என்று கூறியுள்ளார். மேலும் கூட்டணி அமைப்பதால் தமாகா தோற்றுவிக்கப்பட்டதன் நோக்கம் நிறைவேறாமல் போகும் என்று கூறினஆர். இதனால் தமிழ் மாநில காங்கிரசில் உட்கட்சி பூசல் ஏற்பட்டுள்ளது அம்பலமாகியுள்ளது.

English summary

Split started inside the Tamil Manila Congress, as two senior leaders not showing interesting to PWF alliance.