ஊழல் புகார்களை மறைக்கவே அமைச்சர்கள் மாற்றம்: ஸ்டாலின்

By Karthikeyan

Updated: Friday, March 4, 2016, 2:11 [IST]

Subscribe to Oneindia Tamil

சென்னை: ஊழல் புகார்களை மறைக்கவே தமிழக அமைச்சர்களை ஜெயலலிதா மாற்றி வருவதாக திமுக பொருளாளர் மு.க.ஸ்டாலின் தெரிவித்துள்ளார்.

சட்டப்பேரவைத் தேர்தலில் திமுக சார்பில் போட்டியிட விருப்ப மனு அளித்தவர்களிடம் கடந்த 22-ம் தேதி முதல் நேர்காணல் நடைபெற்று வருகிறது. மார்ச் 7-ம் தேதி வரை நேர்காணல் நடைபெறவுள்ளது. திமுக தலைவர் கருணாநிதி, பொதுச் செயலாளர் க.அன்பழகன், பொருளாளர் மு.க.ஸ்டாலின், முதன்மைச் செயலாளர் துரைமுருகன், அமைப்புச் செயலாளர் ஆர்.எஸ்.பாரதி ஆகியோர் நேர் காணல் நடத்தி வருகின்றனர்.

இந்நிலையில் 8 வது நாளான நேற்று தஞ்சை, கடலூர், விழுப்புரம் ஆகிய மாவட்டங்களுக்கு நேர்காணல் நடத்தப்பட்டது. இதனிடையே நேர்காணலுக்கு பின்னர் சென்னை அண்ணா அறிவாலயத்தில் செய்தியாளர்களை சந்தித்த ஸ்டாலின் கூறுகையில், இதுவரை 165 தொகுதிகளில் 3 ஆயிரத்து 245 பேரிடம் நேர் காணல் நடத்தப்பட்டுள்ளதாக தெரிவித்தார்.

அப்போது தமிழக அமைச்சர்கள் மாற்றம் தொடர்பாக செய்தியாளர்களின் கேள்விக்கு பதிலளித்த ஸ்டாலின், அதிமுக ஆட்சியில் நடக்கும் பெரிய தவறுகளை மறைப்பதற்காக அடிக்கடி அமைச்சர்களை ஜெயலலிதா மாற்றி வருகிறார் என்று ஸ்டாலின் கூறினார்.