சைதையில் பாட்டி முதல் பேத்தி வரை குறிவைக்கும் பொன்னையன்- வெற்றி பிரகாசமாம்

By Mayura Akilan

Updated: Thursday, April 21, 2016, 17:08 [IST]

Subscribe to Oneindia Tamil

சென்னை: சைதாப்பேட்டை தொகுதியில் பேத்தி முதல் பாட்டி வரை ஒருவரை விடாமல் கவர் செய்து வருகிறார் அதிமுக வேட்பாளர் பொன்னையன். சிறு குழந்தைகளுக்கு அம்மா தொப்பி கொடுத்தும் முதியவர்களுக்கு இரட்டை இலை விசிறி கொடுத்தும் வாக்காளர்களை கவர்ந்து வருகிறார். சைதை தொகுதியில் தமக்கு வெற்றி வாய்ப்பு பிரகாசமாக இருப்பதாகவும் கூறியுள்ளார்.

நீண்ட இடைவெளிக்குப் பின்னர் சட்டசபைத் தேர்தலில் போட்டியிடுகிறார் சி. பொன்னையன், சைதாப்பேட்டை தொகுதிக்கு உட்பட்ட கங்கையம்மன் கோயில் தெரு, ஆர்.வி.நகர், ராகவரெட்டி காலனி உள்ளிட்ட பகுதிகளில், அதிமுக வேட்பாளர் சி. பொன்னையன், பொதுமக்களிடம் வாக்கு சேகரித்தார்.

அதிமுகவின் சாதனைகளை விளக்கம் துண்டு பிரசுரங்களைக் கொடுத்தும் வாக்கு சேகரிக்கும் பொன்னையன், அதிகம் குறிவைப்பது மகளிரைத்தான்.

வெற்றி பிரகாசம்

அதிமுகவின் அமைப்புச் செயலாளர் என்ற உயரிய பொறுப்பில் இருக்கும் தமக்கும் எல்லாத் தொகுதியுமே, சொந்தத் தொகுதி தான் என்று கூறி வரும் பொன்னையன், அதிமுகவிற்கு வெற்றி வாய்ப்பு பிரகாசமாக இருப்பதாக கூறினார்.

நிதியமைச்சர் பொன்னையன்

நாமக்கல் மாவட்டம், திருச்செங்கோடு அடுத்த, ஒடுவம்பாளையம் கிராமத்தை சேர்ந்த பொன்னையன், எம்.ஜி.ஆர். முதல்வராக இருந்த காலகட்டத்தில், திருச்செங்கோடு தொகுதியில் மூன்று முறை வெற்றிப்பெற்றார். அதன்பின், கடந்த, 2001ம் ஆண்டு திருச்செங்கோடு தொகுதியில் வெற்றிப்பெற்று, முதல்வர் ஜெயலலிதா தலைமையிலான ஆட்சியில், நிதியமைச்சராக இருந்தார்.

கட்சியில் முக்கியத்துவம்

நீண்ட காலம் கட்சியில் எந்த ஈடுபாடும் இன்றி ஒதுங்கியே இருந்த பொன்னையன், கடந்த இரண்டு மாதத்திற்கு முன், தேர்தலில் போட்டியிட விருப்ப மனு கொடுத்தார். இதற்கிடையே, கட்சியில் அவருக்கு முக்கியத்துவம் கொடுக்கப்பட்டு, தேர்தல் அறிக்கை தயாரிக்கும் குழுவில் இடம் பெற்றுள்ளார்.

சைதையில் வாக்கு சேகரிப்பு

இந்நிலையில், சைதாபேட்டை தொகுதியில் போட்டியிட பொன்னையனுக்கு சீட் வழக்கப்பட்டுள்ளது. கடந்த, 2001க்கு பின், தற்போது தேர்தலை சந்திக்கவுள்ள பொன்னையன், வெற்றிக்காக தீவிர பிரச்சாரத்தில் ஈடுபட்டுள்ளார்.

நம்பிக்கை ஜெயிக்குமா

பாட்டி முதல் பேத்திவரை குறிவைத்து சென்னை சைதாப்பேட்டை‌ தொகுதியில் வாக்கு வேட்டையாடும் பொன்னையன், வெற்றி வாய்ப்பு பிரகாசமாக உள்ளதாகவும் நம்பிக்கை தெரிவித்து வருகிறார். பொன்னையனின் நம்பிக்கை ஜெயிக்குமா பார்க்கலாம்.