Just In

அடுத்தபடியாக வருகிறது 'அம்மா டீ'!!

By Vijayalakshmi

Published: Monday, June 16, 2014, 14:33 [IST]

சென்னை: தமிழ்நாடு அப்படிங்கற பேரை மாத்தி "அம்மா" நாடுனு வச்சாலும் ஆச்சரியப்படுறத்துக்கில்லை.

கடந்த சட்டமன்ற தேர்தல்ல ஜெயிச்சு தமிழ்நாட்ல ஆட்சி அமைச்சுது அதிமுக.

குடும்பத் தலைவிகளுக்கு:

அப்போவே, இலவச கிரைண்டர், மிக்ஸி, பேன் அப்டினு இலவசங்களை வாரி இறைச்சது உங்களுக்கெல்லாம் தெரியும்.வீட்டு பொம்பளைங்களுக்கு தேவையான இந்த மூணும்தான் மெயினா அதிமுகவை ஜெயிக்க வச்சுது.

இலவச லேப்டாப் திட்டம்:

அப்புறமா நம்ம பள்ளிக்கூட, காலேஜ் பசங்களுக்கு இலவச மடிக்கணினி , இலவச பஸ் பாஸ், சைக்கிள் அப்படிங்கற பேரில் ஓட்டுப் போடற வயசு வந்த இளந்தாரிகளோட ஓட்டுகளையும் வாங்கி மடில கட்டிக்கிட்டாங்க.

வருங்கால தலைமுறை:

இது பத்தாதுனு வருங்கால ஓட்டுக்கு ஆரம்ப பள்ளி பசங்களுக்கு சிலேட்டில் இருந்து ஜாமெண்ட்ரி பாக்ஸ் வரை கொடுத்தாங்க அம்மா பேரில்.

வீட்டிலும் அம்மா ஆட்சி:

ஒருவழியா ஜெயிச்சு ஆட்சிக்கு வந்ததும் போட்ட திட்டங்கள்தான் இன்னைக்கு ஒவ்வொரு வீட்டிலும் சாப்பாட்டில் இருந்து சமையல் அறை வரை இடம் பிடிச்சுருக்கு.

அம்மா உணவகம்:

மொதல்ல சாப்பாடு.... அம்மா உணவகம் அப்படிங்கற பேரில் எல்லாரும் சாப்டற மாதிரி காலை, மதியம் அப்படினு வயித்துக்கு உணவளிக்க ஆரம்பிச்சாங்க. நின்னுகிட்டே சாப்பிட்டாலும், நிறைவா சாப்பிட்டதா மக்கள் சொல்ல ஆரம்பிச்சாங்க.

அம்மா குடிநீர்:

சரி சாப்பாடு கொடுத்தா போதுமா? அது செரிக்க தண்ணீ வேணும்ல. அதுக்காக வந்ததுதான் அம்மா குடிநீர். ரூபாய் 10 க்கு ஒரு பாட்டில்னு மக்களோட தாகமும் தீர ஆரம்பிச்சுது. பஸ் ஸ்டாண்டிலையே கிடைச்சதால, பயணிகளோட தாகமும் தீர்ந்துச்சு.

அம்மா உப்பு:

அதுக்குப் பின்னாடியே சாப்பாட்டில் போடற உப்பும் அம்மா பேரில் வர ஆரம்பிச்சுது. இப்போ புதுசா "அம்மா டீ" யும் சீக்கிரமா வரப் போறதா பேசிக்கிறாங்க. அதுவும் மலிவு விலைல வந்து மத்த கம்பெனிங்க வயித்தில் புளியைக் கரைக்க போகுதாம்.

தீவிர சிந்தனையில் அமைச்சர்கள்:

இப்போ என்ன பிரச்சனைனா அம்மாகிட்ட நீ மட்டும்தான் பேர் வாங்குவியா, நானும்தான் சாதிப்பேன் அப்படினு ஒவ்வொரு அமைச்சரும் அம்மா பேரில் ஏதாவது ஒன்னை அறிமுகப்படுத்தனும்னு படாதபாடு பட்டுகிட்டு இருக்காங்களாம். அவர்கள் துறை சார்ந்த அதிகாரிகளை இதற்காக ஆட்டி வைப்பது தனிக்கதையாம்.