தமிழக பாஜக கூட்டணியில் இந்திய முஸ்லிம் முன்னேற்ற கழகம் தொடர்கிறது: சதக்கத்துல்லா

சென்னை: தமிழகத்தில் பாரதிய ஜனதா தலைமையிலான கூட்டணியில் இந்திய முஸ்லிம் முன்னேற்ற கழகம் தொடர்ந்து நீடிக்கும் என்று அதன் தலைவர் சதக்கத்துல்லா கூறியுள்ளார்.

தமிழகத்தில் தேசிய ஜனநாயக கூட்டணியில் இடம் பெறும் கட்சிகளை உறுதி செய்வதற்காக பாஜக தமிழகப் பொறுப்பாளரும் மத்திய அமைச்சருமான பிரகாஷ் ஜவடேகர் நேற்று சென்னை வந்துள்ளார்.

தனியார் ஹோட்டலில் தங்கியுள்ள அவரை, அகில இந்திய முஸ்லிம் முன்னேற்ற கழக தலைவர் சதக்கத்துல்லா சந்தித்து கூட்டணி குறித்து பேச்சவார்த்தை நடத்தினார். இந்த பேச்சுவார்த்தையின் போது முஸ்லிம் முன்னேற்ற கழகம், தேசிய ஜனநாயக கூட்டணியில் நீடிக்க விருப்பம் தெரிவித்துள்ளது.

இதனையடுத்து பிரகாஷ் ஜவடேகரும், சதக்கத்துல்லாவும் கூட்டாக பேட்டி அளித்தனர். அப்போது, தேசிய ஜனநாயக கூட்டணியில் அகில இந்திய முஸ்லிம் முன்னேற்ற கழகம் தொடர்கிறது என்று சதக்கத்துல்லா தெரிவித்தார்.

மேலும், சட்டமன்றத் தேர்தலில் 234 தொகுதிகளிலும் தேசிய ஜனநாயக . கூட்டணிக்கு முழு ஒத்துழைப்பை அளிப்பதாகவும், தொகுதி பங்கீடு தொடர்பாக பா.ஜ.க. தலைமை எடுக்கும் முடிவினை ஏற்பதாகவும் அவர் தெரிவித்தார்.

சதக்கத்துல்லாவுடன் நடத்திய பேச்சுவார்த்தை திருப்தி அளிப்பதாக பிரகாஷ் ஜவடேகர் தெரிவித்தார். இதேபோல் இந்திய ஜனநாயக கட்சியின் தலைவர் பாரிவேந்தர், புதிய நீதிக்கட்சித் தலைவர் ஏ.சி.சண்முகம் ஆகியோரையும் பிரகாஷ் ஜவடேகர் நேற்று சந்தித்து பேசினார். இந்த சந்திப்பின் போது பாஜக தமிழக தலைவர் தமிழிசை சவுந்தரராஜன் உடனிருந்தார்.

English summary

All India Muslim Munnetra Kazhagam alliance with BJP in Tamilnadu.