தமிழக மக்கள் குடும்ப அரசியலை ஏற்கமாட்டார்கள்.. நடராஜனுக்கு, இல.கணேசன் பதிலடி

கட்சியில் குடும்பமாக இருக்கலாமே தவிர, ஆட்சியில் குடும்ப அரசியலை மக்கள் ஏற்க மாட்டார்கள், என பாஜக ராஜ்யசபா எம்.பி இல.கணேசன் தெரிவித்தார்.

திருவையாறு: குடும்ப அரசியலை தமிழக மக்கள் ஏற்க மாட்டார்கள் என பாஜக ராஜ்யசபா எம்.பி இல.கணேசன் தெரிவித்தார்.

தியாகராஜர் ஆராதனை விழாவில் பங்கேற்க, திருவையாறு வந்திருந்த பாஜக ராஜ்யசபா எம்.பி. இல.கணேசன் தெரிவித்ததாவது:

கட்சியில் குடும்பமாக இருக்கலாமே தவிர, ஆட்சியில் குடும்ப அரசியலை மக்கள் ஏற்க மாட்டார்கள். அது தமிழகமாக இருந்தாலும், உத்தரபிரதேசமாக இருந்தாலும் ஆட்சியில் குடும்ப அரசியலை மக்கள் ஏற்க மாட்டார்கள்.

ஜல்லிக்கட்டுக்காக போராட்டம் நடத்தியவர்கள் மீது காவல்துறையினர் தடியடி நடத்தியது தேவையற்றது. ஜல்லிக்கட்டு நடக்காமல் இருப்பது அதிர்ச்சி அளிக்கிறது. இவ்வாறு இல.கணேசன் தெரிவித்தார்.

அதிமுக பொதுச்செயலாளர் சசிகலாவின் கணவர் நடராஜன், நிகழ்ச்சி ஒன்றில் பேசியபோது, நாங்கள் குடும்ப அரசியல்தான் நடத்துகிறோம் என கூறியிருந்தார். இந்நிலையில் அவருக்கு பதிலடி கொடுக்கும் விதமாக இல.கணேசன் பேசியுள்ளது குறிப்பிடத்தக்கது.

இதனிடையே துக்ளக் ஆசிரியர் குருமூர்த்தியும், குடும்ப அரசியலை துக்ளக் எதிர்க்கும் என கூறியுள்ளது நினைவிருக்கலாம்.

English summary

Tamilnadu people won't accept Family politics, says BJP Rajyasabha M.P.Ganeshan.