தூத்துக்குடி: வெடிகுண்டுகளை வீசி மீனவர்கள் மோதல்: காயமடைந்த மீனவர் மரணம்

தூத்துக்குடி: தூத்துக்குடி அருகே இருதரப்பு மீனவர்கள் வெடிகுண்டுகளை வீசி மோதிக்கொண்டதில் ஒருவர் உயிரிழந்த சம்பவம் பதற்றத்தை ஏற்படுத்தியுள்ளது.

தூத்துக்குடி மாவட்டம் உடன்குடி அருகே உள்ள மணப்பாட்டில் திருச்சிலுவை ஆலயம் உள்ளது. இங்கு திருவிழா நடத்துவது தொடர்பாக அப்பகுதியை சேர்ந்த மீனவர்கள் இரு தரப்பினரிடையே மோதல் இருந்து வருகிறது.

இந்நிலையில் நேற்று மாலை இரு தரப்பினரிடையே மீண்டும் மோதல் ஏற்பட்டது. இதில் 2 தரப்பினரும் பயங்கர ஆயுதங்கள் மற்றும் வெடிகுண்டுகளை வீசி மோதிக்கொண்டனர்.

இந்த மோதலில் மணப்பாடு ராஜாதெருவைச் சேர்ந்த ரோசாரி (வயது 35), ரேடியோ தெருவைச் சேர்ந்த ரகுபதி (45) மீனவர் காலனியைச் சேர்ந்த ரெஜிஸ்டன் (30), சுனாமிகாலனியை சேர்ந்த பாஸ்கர் (50), லாரன்ஸ் மனைவி ஒவிலியாள் (50), ரேடியோ தெருவைச் சேர்ந்த பிரான்சிஸ் சேவியர் லியோ (48) மீனவர் காலனியைச் சேர்ந்த பிரட்வின் (31) ஆகிய 7 பேருக்கு அரிவாள் வெட்டு விழுந்தது. 7 பேரும் தூத்துக்குடி அரசு மருத்துவமனையில் சேர்க்கப்பட்டனர். இதில் சிகிச்சை பலனின்றி ரோசாரி இறந்தார்.

இதனையடுத்து ரோசாரி தரப்பைச் சேர்ந்தவர்கள் மீண்டும் மோதலில் ஈடுபட்டனர். இந்த மோதலில் 2 கார், 3 பைக்குகள் தீ வைத்து எரிக்கப்பட்டது.

இந்த மோதல் தொடர்பாக சுனாமி காலனியை சேர்ந்த பாஸ்கர் என்பவர் குலசேகரன்பட்டினம் போலீசில் புகார் செய்தார்.

அதன்பேரில் போலீசார் மணப்பாடை சேர்ந்த ஹயாஸ், தயா, பென்டிகர், ஜெயா, மில்டன் உள்பட 6 பேர் மீது வழக்கு பதிவு செய்தனர். சேவியர் கொடுத்த புகாரின் பேரில் சந்தோஷ், மகிபெல், ராபின்சன், விஜயேந்திரன், ஜான்சன் ஆகிய 5 பேர் மீது வழக்கு பதிவு செய்யப்பட்டுள்ளது. இந்த மோதலால் மணப்பாடு பகுதியில் பதட்டம் நிலவி வருகிறது. இந்த மோதல் காரணமாக மணப்பாடு மீனவர்கள் பலர் தங்களது குடும்பத்துடன் அங்கிருந்து வெளியேறி பக்கத்தில் உள்ள மீனவ கிராமங்களில் குடியேறி உள்ளனர்.

இதையடுத்து அங்கு ஏராளமான போலீசார் குவிக்கப்பட்டுள்ளனர். தூத்துக்குடி மாவட்ட எஸ்.பி.துரை சம்பவ இடத்திற்கு வந்து விசாரணை மேற்கொண்டார்.

English summary

Tension mounted in Manappadu near Tuticurin following a clash, which erupted between two groups of fishermen on Monday.