தமிழகம், சென்னையில் இன்று மழை பெய்யுமாமே!
சென்னை: தமிழகத்தில் இன்றும் பரவலாக மழை பெய்யும் என்று வானிலை ஆய்வு மையம் தெரிவித்துள்ளது.
தென்மேற்கு பருவமழை கடந்த சில வாரங்களாக கர்நாடகா, கேரளா ஆகிய மாநிலங்களில் பரவலாக பெய்து வருகிறது. தமிழ்நாட்டை பொறுத்தவரையில், நீலகிரி மாவட்டத்தின் மலைப்பகுதிகளிலும், கோவை மாவட்டத்தின் சில பகுதிகளிலும் பரவலாக மழை பெய்தது.
அதே போல், தமிழ்நாட்டின் சில இடங்களில் வெப்பச்சலனம் காரணமாக கடந்த சில நாட்களாக நல்ல மழை பெய்து வருகிறது. சென்னை மற்றும் அதன் புறநகர் பகுதியில் நேற்று முன்தினம் இரவு பலத்த மழை பெய்தது.
இந்த நிலையில் அடுத்த 24 மணி நேரத்தில் வெப்பச்சலனம் காரணமாக தமிழ்நாடு மற்றும் புதுச்சேரியில் ஒரு சில இடங்களில் மழையோ அல்லது இடியுடன் கூடிய மழையோ பெய்யும்.
சென்னையை பொறுத்தவரையில், இன்று மாலை நேரத்தில் ஒரு சில பகுதிகளில் மழையோ அல்லது இடியுடன் கூடிய மழையோ பெய்ய வாய்ப்பு இருப்பதாக சென்னை வானிலை ஆய்வு மையம் தெரிவித்துள்ளது.
அதிக அளவாக கோவை சின்னக்கல்லூரில் 10 செமீ மழை பதிவாகியுள்ளது என்பது குறிப்பிடத்தக்கது.